Lider di partido AVP kier laga pueblo kere cu partido AVP a traha bon durante gobernacion di 2009 pa 2017. Aki suco ta gaba su mes. E motibo ta logico. AVP a ripara cu su acogida den pueblo ta limita y cu ningun otro hende den su sano huicio lo hacie. Mester remarca cu partido AVP cu no ta nada otro cu partido MEP. Nan a hinca Aruba cu 1.8 biyon florin di debe.
Lider partido AVP a expresa cu partidonan chikito no tin vision. E vision di partido AVP sigur lo nos no desea paso ta un vision cu a hinca Aruba den debe. Despues di a gana eleccion na september 2013 a bisa di lo no subi edad di pensioen na 65 aña, pero no a tarda hopi cu na januari 2014 edad di pensioen a subi na 65 aña.
Pa colmo esunnan cu a baha cu pensioen despues no a haya e premienan te cu a hiba gobierno hues. OPPA te cu dia di awe ta hiba un lucha contra di gobierno. For di 1.8 biyon florin por a renoba hospital, traha un warda di polis na Oranjestad y mucho mas por a ser haci cu biyones di e florin ey fia.
Minister di husticia e tempo ey a haya un rapport cu Warda di polis Oranjestad na Wilhelminastraat 40 no tabata apto pa e polisnan traha aden. Despues di hopi protesta na juli 2015 polis a logra bay otro banda na Wilhelminastraat 31-33 cu tampoco tabata bon pa salud di polisnan y awe tin polis cu hasta a fayece despues di a lucha cu cancer y ainda tin ta lucha cu nan salud.
Partido AVP a tapa corupcion di partido MEP entre otro e regalo di 2.1 miyon florin cu a duna Lee Tofanelli. Un regalo cu a sali for di cartera di e pagadonan di belasting, mientras gobierno a forsa nos grandi paga pa nan propio remedi. Den e proximo eleccion partido AVP sigur lo no ta e partido mas grandi. Al contrario: En bes di crece nos ta mira partido AVP na 5 asiento. Pueblo no kier bay cas bek. Awe edad di pensioen na 65 aña sigur ta un peso riba lomba di nos pueblo paso hopi caba prome cu yega 65 aña ta sin trabao.
Lider di partido AVP deliberadamente ta trata na bende nos pueblo un 6 pa un 9 riba e matrimonio di mesun sexo. Dia 25 di september 2015 el a firma pa Sustainable Development Goals Agenda 2030 y punto 5 di Sustainable Development Goals ta igualdad di genero unda e matrimonio di mesun sexo ta hinca. Bo no por firma pa bay di acuerdo cu e agenda 2030 cu ta accentua igualdad di genero pa despues bin bisa cu bo no ta di acuerdo cu n’e y cu bo ta contra matrimonio di mesun sexo. Anto e ora ey bo no mester a firm’e.
Partido MEP parce cu a sigui e modus operandi di AVP cu ta un partido Cristian democrata. Un partido AVP cu ta bay contra di principio di su mesun partido y contra leynan di Dios. MEP tambe a firma e Sustainable Development Goals cu ta accentua matrimonio di mesun sexo. Partido MEP mester a para duro contra e falta cu partido AVP a comete ora di a firma pa e agenda 2030.
Partido MEP igualmente a aumenta e debe di pais Aruba, paso a pesar di su gobierno a ricibi mas cu 2 biyon florin na entrada keto bay pueblo mester biba rudia paso no tin placa pa pueblo. E prome minister a declara recientemente di lo cremencha den presupuesto pa introduci algun “toeslag” pa yuda esunnan mas vulnerabel.
Atrobe ta tuma pueblo hasi, paso e prome minister ta bon na altura cu segun Banco Central mas di 50% di nos poblacion ta den un situacion financiero di preocupacion te malo. Tin placa pa complace esunnan afilia na e partido pero pueblo mester siña biba di e garnachinan cu ta cay for di mesa (Mateo 15,21-28).
Ta tristo pa mira con partido MEP ta sigui menosprecia partido RAIZ, pero RAIZ no kier lanta for di soño. Sushi y holo stinki tur caminda y asina mes partido RAIZ no kier realisa cu su mannan ta mara y cu e no por hasi nada si partido MEP no dun’e autorisacion. Un gobierno mas bruha cu un boli hilo. E stoel parce di ta hopi confortabel y RAIZ ta sigui sostene e barco cu ta sink. Nos ta bibando den tempo di Dios y no den tempo politico. Partido RAIZ ta morto caba p’esey nan ta sigui wanta sla y cobra fin di luna. ‘”Pull the plug’” partido RAIZ.
E husticia di Dios ta aki y e coalicion aki lo no scapa for di gara di Dios. Ora bo bay contra leynan di Dios lo bo sinti su consecuencianan. B’a sembra recoge bo cosecha. Tempo di Dios ta perfecto. E palabra di Dios ta si y amen. Partido Curpa ta e unico alternativa.
