Hof a yega na e mesun decision den e caso cu Ministerio Publico a cuminsa contra un hungado profesional di poker cu e kier a acusa di labamento di placa. No por papia di labamento di placa, tabata e decision di hof.
A trata e caso e siman aki, unda cu tres hues a analisa henter e caso di nobo. Ministerio Publico no a keda contento cu e prome decision, pero den hof tampoco nan a logra.
Ta trata di e caso contra Pieter Susebeek (32) kende ta conoci pa ta un hungado di poker pa hopi aña caba, for di un edad hoben.
Semper bay el a declara cu e placa cu a haya na e cas, unda autoridad a tira razzia den un investigacion contra su tata, ta pertenece na dje. E tabatin placa warda den e safe di su tata. Hasta el a declara na corte cu prome cu esey, e tabatin varios pitbull pa evita cu ladronnan drenta e cas.
E acusado a splica y demostra cu publicacionnan y un renchi cu e tin di un torneo, cu for di aña 2010 e ta un hungado profesional di poker, local y internacionalmente. Ministerio Publico a haci investigacion pero a limita nan investigacion na e periodo di juli, 2019 pa januari, 2021.
Tabata parce manera cu Procurador General no tabata compronde e situacion, ya cu e tabata kier a tira cu ta trata di gamblemento mientras cu e abogado di su banda a mustra claramente cu no ta hungando contra casino sino contra otro hungadonan. Mester uza strategia pa por gana. Y a pone hopi enfasis cu loke Susebeek ta haci no ta algo castigabel manera PG ta pretende.
Abogado mr. Kock a splica e tres huesnan cu su cliente a gana dos renchi di World Series of Poker, cu ta un liga hopi dificil.
E huesnan no a tuma mucho tempo pa pasa y a declar’e liber y a ordena Ministerio Publico pa entrega e suma di placa confisca.
