Ningun hende tin derecho di maltrata otro, pasobra esey no ta sano y e ta castigabel pa ley.
Den ningun enseñansa sano, y puro cu hende por ricibi no ta inclui maltrato.
Maltrato no ta algo cu mester wordo aproba tampoco,ni tampoco scondi , tur maltrato mester wordo denuncia, pasobra tin hopi ta probecha y manipula, pensando cu nan ta indispensabel, y cu nan por sigi abusa dia aden y dia afo.
E palabra di Dios ta para totalmente contra violencia domestico y relacional, pasobra den Efesionan 5:25 ta para skirbi: Esposonan, stima boso esposa, mescos cu Cristo tambe a stima e iglesia y a entrega su mes pe.
Awendia tin e forma di cuminsa biba cu otro sin casa, y hopi biaha tin jaloersheid ta presenta, pasobra bo ta wak tur caminda y bo ta mira hende ta publica “in a relationship” y esnan cu ta publica “married “ no ta aparece hopi.
Hende kier biba ilegal tanto pa ley como pa Dios, p’esey nan ta duna nomber na cosnan cu no ta existi, y despues ora problema cuminsa tur cos ta wordo publica.
Laga nos sali for di e punto di bista cu for di ora un persona ta bisa esaki ta mi muher, of mi homber e mester casa pa ley y pa iglesia y biba den nan cas , apartamento etc, pasobra ta esey e palabra di Dios, ta demanda di nos, pa e homber bandona cas di su tata y su mama y uni cu su esposa y nan dos lo ta un solo carni.(Genesis 2:24).
Awendia bo ta haya muchanan menor di edad ta cana papia di mi muhe y mi homber, y nan no a caba scol ainda of nan a stop di bay scol.
Y esey ta bini door cu nan a djis drumi cu otro ya nan ta considera nan mes propiedad di otro, y ta pesey bao di hubentud tin asina tanto violencia y hasta matamento.
Tur esakinan ta contrario na siñansa sano, y educacion puro y limpi cu nan mester a ricibi di nan mayornan.
Hopi di e relacionnan ey awendia ta wordo cumpra cu placa y cu material, y asina nan ta cuminsa pensa cu nan tin dominio riba otro.
Pero tin hopi matrimonio tambe caminda e homber y e muhe ta haci net contrario na e palabra di Dios.
Machismo,y manipulacion di ambos banda ta causando hopi dolor entre pareha,
E muhe virtuoso ta corona di su esposo,ma e muhe cu ta causa berguensa, ta manera putrimento den su wesonan ( Proverbionan 12:4).
Tur tipo di insulto ta causa herida y ta pica den bista di Dios, hende no t’ey pa kibra otro, pero pa edifica otro.
P’esey e palabra di Dios ta bisa den Proverbionan 18:21: Morto y bida ta den poder di lenga,y esnan cu stima esaki lo come su fruta.
Hopi hende ta kibra nan matrimonio cu nan boca.
Esun cu haya un esposa ta haya algo bon, y ta ricibi fabor for di Señor.( Proverbionan 18:22).
Un homber of muhe por ta bon studia, cu titulo, cu rikesa, den posicion halto, pero malicia, inmoralidad, adulterio y abusado ta kibra tur locual e por tin , y su bida ta perde respet, no tin integridad, tampoco tin responsabilidad.
Palabra di Dios ta bisa laga e cama ta sin mancha, y cu Dios lo castiga e adulteronan.
Den tur matrimonio, den tur relacion, respet ta bini na prome luga, si no tin respet ningun relacion tin fundeshi.
P’esey ta bon pa warda riba Dios prome cu core drenta relacion emocional sin consulta cu Dios.
Skirbi pa Pastor Marcel Balootje.
