Aunke no ta prome biaha cu Alexander Ras ta haya su mes envolvi cu husticia, y pa caso grandi, toch corte a dun’e un chens. Por papia di un chens pero mara na un linea di condicionnan.
Diabierna mainta e mester a presenta un biaha mas den corte unda cu el a scucha cual ta e decision cu hues a dicidi di tuma den su caso.
Mesora a cuminsa pa splica cu a keda legalmente proba e acusacion contra dje cu riba 12 di augustus di aña pasa el a purba mata un homber ora cu el a propin’e varios hinca. A splica tambe cu no por proba e acusacion cu Ministerio Publico a trece dilanti di intento di asesinato. Pa por hay’e culpabel di e acusacion aki mester bini cu pruebanan cu ta mustra cu e tabatin e plan ey di haci daño prome cu el a topa cu ne riba caya.
Pero tampoco hues a bay di acuerdo cu e splicacion di defensa cu tabata trata di defensa propio. E ta haya cu e mester keda leu di e homber, cu kende e tin un “beef”. Tin prueba di camaranan di siguridad unda cu por mira cu ta e acusado ta esun cu a bay busca problema ora cu el a mira e homber riba caya. No solamente el a bay di un forma agresivo riba dje sino cu ora e tabata su dilanti, el a saca un cuchiu. E tabata cana arma.
Por corda cu e homber hoben aki den pasado tabata envolvi cu husticia caba y e biaha’ki, recien cu el a sali di KIA a busca e problema aki pa su curpa. Hues a mustr’e cu loke el a haci tabata hopi serio ya cu e victima por a fayece di e nada menos cu 8 hincanan cu el a propin’e. Loke a tum’e hopi na malo ta cu e acusado aki a comete e delito den presencia di un menor, yiu di e victima. E mucha aki a yega cerca y a mira su tata den e situacion ey.
Otro aspecto cu a tum’e na malo ta cu Ras a haya un chens pa sali di KIA prome cu el a caba di sinta su castigo anterior. Apenas dos siman e tabatin afo despues di a sinta casi 10 aña pa hinca su ex-pareha mata.
Castigo so no ta yuda y nan kier yud’e pa e cambia e rumbo cu e ta siguiendo aworaki. A laga traha rapport di Reclassering, Psycholoog y Psikiatra. Tur ta mustra cu e tin un problema. E tin un actitud antisocial y paranoid cu ta hinc’e den problema, si e no controla su mes. Esey ta loke cu a pasa dia cu el a hinca su victima ocho biaha. El a kere cu e homber tin algo contra dje. Esaki ta causa cu e no ta 100% responsabel durante cu el a comete e acto. E pio ta cu e por bolbe haya su mes den un situacion similar y esaki ta algo cu mester traha pa evita.
Nan a conseha pa dun’e TBS (na disposicion di estado) y cu condicionnan special, pero sin cu e mester wordo interna. Manera ta conoci, Aruba tin problema cu no por haya espacio na un centro reconoci na Hulanda y aki mes no por paga un centro di e indole aki.
E opcion cu e expertonan a duna ta pa lag’e bay RESPALDO pa haya su tratamento durante dia. E por bay cas atardi pa drumi. Y den esaki e mester haya guia di trahadonan di Reclassering.
Den henter e periodo aki cu e tin TBS, e lo mester sigui ordo di Reclassering, incluso tuma tratamento necesario. Tambe e mester haci un control di urina tur luna pa mira si e ta uza droga. Otro condicion ta cu e mester sigui un curso di control di agresion. E mes a indica caba cu e ta dispuesto pa haya ayudo. Y e ultimo ta cu e tin un prohibicion pa tuma contacto cu su ex-amiga y e victima.
Na final, hues a bisa cu e lo mester un castigo pisa. Pero como cu ta pidi pa pone bou di TBS, e maximo castigo cu por impone den un situacion asina ta seis aña y esey el a dun’e tambe.
Esaki ta nifica cu asina e sali y ta cuminsa cu su tratamento. Y loke ta straño ta cu e tratamento aki no tin fecha final di caba. Ta solamente a base di evaluacion continuo ta mira si e ta cla pa lag’e “liber”.
E tin dos siman pa apela, pero tin indicacion cu e ta bay di acuerdo.
