Mientrastanto cu den comunidad tin fuerte rumor ta coriendo cu partidonan ta den negociacion p’e regreso di e politico veterano ir. Mike de Meza pa Partido Patriotico Arubano (PPA), e lider di fraccion den Parlamento, Eduard Pieters, a aclaria e situacion. Pieters a confirma cu tin combersacionnan frecuente pa motibo di e gran experiencia di De Meza, pero a desmenti categoricamente cu tin un deal cera pa un traspaso politico.
Segun Eduard Pieters, e contactonan cu de Meza ta di caracter consultativo y basa riba su gran trayectoria. “Mike de Meza ta un persona cu hopi aña di trayectoria. Mi ta siña hopi fo’i dje,” Pieters a declara, indicando cu e ta combersa tambe cu politiconan manera Otmar Oduber y Marlon Sneek pa busca conseho cerca esnan cu tin mas experiencia.
E lider di fraccion di PPA a bay directamente contra e speculacionnan di un movecion politico inminente, splicando cu de Meza mes a duna di conoce publicamente cu tanten cu e tin e espacio den fraccion di AVP pa expresa su opinionnan libremente, e no ta wak un motibo valido pa cambia di partido. PPA ta respeta e postura aki completamente.
A pesar di esaki, Pieters ta reconoce cu e deseo ta biba den pueblo, specialmente na San Nicolas caminda tin expresionnan cu e districto mester bay bek “orange”. “A fin y al cabo nos mester voto. Si San Nicolas kier nos ta bolter e cos, so be it. Nos ta habri p’e”, el a agrega.
Finalmente, Pieters a aclaria cu cualkier decision oficial tocante un entrada ta cay exclusivamente den man di e directiva, hunto cu e lidernan actual riba e lista politico.
Pa mas detaye lesa TREMPAN.
