Catharina Kelly-Albertz ta victima di atraco cu a sosode diabierna dia 1 di Februari y ainda e tin dolor na henter su curpa. E tin 77 aña y den un lapso cortico ta atrak’e dos biaha y tur dos biaha a bay cu su placa di pensioen pa e por paga su debenan. E ta yen di dolor y mesora nos reporteronan a yama Ambulance pa un revision. Ey e paramediconan a dicidi di transporta e victima pa Hospital pa ricibi tratamento medico mas avansa.
Den comunidad tin un rabia grandi riba esnan cu a comete un acto asina pisa riba dje. E ta conta cu su salud no ta mucho bon. El a keda cu hopi dolor y te ainda e tin dolor. E atracadonan a haci abuso, ranca su tas for di su schouder, hera saca su brasa for di luga, pa despues bent’e abao.
Catharina Kelly a comenta cu Papa Dios ta yud’e. E no kier pa ningun hende dun’e un man. E so kier keda den man di Señor.
E momento di e atraco, Catharina Kelly tabata tin su placa di pensioen y tabata pa bay paga un debe na RBC. E tabata hibando cen eynan. Diripente e atracadonan a sali bin na careda riba dje y tira man. Ni papia, a coy e tas, bringa cun’e y a dal’e bent’e abao.
Tabatin un dama a bin pa yud’e. Ora cu a lant’e cana cun’e pasa p’abao di La Granja, den e parkinglot, hib’e na RBC. Yega eyden un security a traha tiki awa cu sucu pa e bebe. Ey nan a yama polis.
Recherche a bin awe bek cerca dje. Nan a pasa cun’e cerca di hospital bieu, unda cu e hecho a sosode. Nan a core cun’e, caminda e señora a mustranan unda e dos atracadonan aki a core bay.
Ta trata aki di dos mucha jong, segun Sra. Catharina. El a splica cu un di nan tabatin un tas. E otro tabatin cabey ta baha den su cara. E atracadornan no a papia ningun palabra. Ni sikiera cu nan por a lant’e for di eybao, e ta relata.
Catharina Kelly tabata hopi emocional durante e entrevista. No ta mucho tempo pasa nan a atrak’e, mas of menos dos aña pasa. E biaha ey tabata personanan di habla Spaño. El a bisa cu te dia di awe, nan no a haya e hendenan cu a hort’e, ni tampoco Polis no a ni yam’e, ni bin cerca dje bis’e cu nan no por a haya e ladronnan. Nan no a bolbe mas cerca dje. E tempo ey nan a bay cu 1500 florin.
E hecho cu e ta emocional ta tambe debi cu na inicio di december ultimo el a perde su casa. E ta sinti su mes hopi solitario. Ora nan a atrak’e e prome biaha, el a keda como 3 luna na Colombia pa tratamento medico. Ora el a regresa el a haya su casa mal cuida y a bay atras di salud, te cu el a fayece. Mira awor dos luna despues atrobe e ta hay’e den e mesun situacion, unda a atrak’e cerca di unda a hort’e caba como dos aña pasa.
Na final, Catharina Kelly a expresa cu e kier pa castiga e malhechornan, mester cera nan. Hendenan asina merece un castigo, el a bisa cu un bos serio pero yena di dolor.
