Minister Besaril na Aruba pa lansamento di website

Minister Plenipotenciario Guillfred Besaril a atende lansamento di e website di Futura: Aruba Government Innovation Lab na Sufside Marina diabierna cu a pasa. E evento a conta tambe cu presencia di Prome Minister mr. Evelyn Wever-Croes, Minister di Husticia, Siguridad y Integracion mr. Andin Bikker , minister di Asunto Social y Labor Glenbert Croes, diferente hefe di departamentonan di gobierno y demas invitadonan.

Na e ocacion aki Prome Minister Wever-Croes a tene un discurso unda e mandatario a enfatisa e importancia di innovacion pa Aruba, banda di e retonan cu Gobierno tin riba tereno financiero, social y e situacion na Venezuela. Prome Minister tabata tin palabra di elogio pa Futura y kico tur nan a bin ta haci desde cu Futura a keda funda na 2018.

Futura ta e bureau di Gobierno pa cu innovacion. Varelie Croes ta na cabes di Futura. Prome cu a lansa e website nobo Varelie a duna un resumen chikito di e proyectonan cu Futura ya caba a realisa den nan prome aña di existencia. Tambe Varelie a duna un splicacion riba e terenonan cu Futura ta concentra riba dje, cu ta e-government, smart society, talent, social innovation y entrepreneurship.

Un punto importante cu Varelie a trece dilanti cu Futura ta mas bien un plataforma, pasobra innovacion ta un proceso cu mester biba bou di henter e comunidad .y no mester ta algo di gobierno so. Ta pesey Futura ta tene presentacionnan na scolnan pa asina e hobennan na un edad hopi jong ta bin ta tende y siña kico ta innovacion y e rol di esaki den future.

Varelie a invita tur hende pa bishita e website y trece ideanan cu por haci e desaroyo riba tereno di innovacion uno mas interactivo.

Minister Besaril a felicita Futura cu nan website nobo y a bisa di ta hopi impresiona riba e dinamismo cu ta reina na Futura pa cu e desaroyo innovativo na Aruba.