Departamento di Trafico di Polis ta investigando e accidente serio cu a tuma luga marduga na altura di Paradera. Lamentablemente e hoben chauffeur ta den coma, interna na Hospital. Consecuentemente, a dicidi pa haci un investigacion mas prufundo na e sitio, desde awe mainta 11:00am.

Polisnan di Trafico a cera e caminda dilanti Great Rich Bar Restaurant. Ey e accidente serio a sosode awe pa mas o menos 3:45am. Un hoben na stuur di un Nissan Skyline (RHD) biniendo cu velocidad halto a perde control y dal contra un palo di luz. 

Polis investigando accidente serio di awe marduga: Chauffeur di e auto ta interna den Hospital y ta den coma. Ta purbando pa mand'e Colombia asina cu su situacion stabilisa

Polis investigando accidente serio di awe marduga: Chauffeur di e auto ta interna den Hospital y ta den coma. Ta purbando pa mand'e Colombia asina cu su situacion stabilisa. Click e link pa mas https://24ora.news/2IBu4za

Posted by 24ora on Wednesday, October 9, 2019

Durante e accidente, agentenan na e sitio no a sinti e necesidad di avisa Departamento di Trafico, posiblemente door cu e chauffeur tawata na tino pero si kehando di hopi dolor. Durante dia Dokternan a manda e hoben den Coma. Esaki debi cu el a ricibi multiple trauma y lo tin sangramento interno. Mirando cu su situacion lo a bira mas serio, esaki a pone cu mesora a cuminsa cu e preparacionnan necesario pa sali cune mas lihe posibel direccion Colombia.

Polisnan di trafico a presenta na e sitio ora cu informacion a drenta di e con serio e situacion di e hoben chauffeur ta of a bira. Esaki a haci cu nan mesora a presenta dilanti Great Rich y a cera e caminda.

Awacero a hunga un rol

Awacero a hunga un rol grandi y a obstaculisa e investigacion y sin conta cu hopi auto a pasa ariba e spoor(rastronan) nan cu por a yuda. Great Rich ta dispone di camera, pero e no ta poni na e angulo unda e accidente a pasa. Tin un camera so cu lo por yuda Polis y esey ta na e mast halto di Setar, si e ta den funcion esey lo por indica kico exactamente a sosode.

Otro accidente 7 luna pasa

E chauffeur aki, riba dia 18 di Maart ultimo a hay’e envolvi den un otro accidente di auto y tambe segun nos a compronde tawata na stuur di un otro Skyline. E accidente ey a sosode na altura di Cas Casuela. Segun informacion, e dia eynan el a resulta herida tambe pero no tawata di e serio ey.

Awe marduga e no tabatin mesun suerte cu na Maart y a resulta seriamente herida.

Comments

comments