Vereniging Rijschool Aruba no ta di acuerdo cu e hecho cu Cuerpo Policial a dicidi di stop di duna examen di rijbewijs debi na presencia di Covid-19 na Aruba.
Den un conferencia di prensa di e organisacion VRA, Thomas Ruiz (Secretario) a duna informacion di loke ta pasando na Bureau Examen Rijbewijs cu tin nan preocupa. Cu hopi asombro a tuma nota di e informacion di KPA bisando cu nan ta stop di duna examen durante 2 siman siendo cu un siman prome a anuncia e fechanan pa pasa rijbewijs.
E noticia a confundi hopi alumno di e rijschoolnan. Mester a splica nan kico ta pasando. VRA ta spera cu e oficina BER di KPA uza e dos simannan aki pa prepara e sistema digitalisa di pasamento di rijbewijs pa categoria A (Brommer), C (truck), D (Bus) y E (trailer). Tin masha hopi hende ta sperando e chens pa pasa rijbewijs, specialmente pa nan trabou of pasobra no kier haci uzo di transporte publico debi na Covid-19.
Na mesun momento a anuncia cu Wilfred Hart, formando parti di e comision di Gobierno, a informa nan cu su contract ta finalisa fin di e luna aki. Ta haci evaluacion na Minister pa re-evalua e decision aki cu e meta pa mehora e servicio cu ta duna na BER.
Tambe a informa e candidatonan cu lesnan di coremento of pasa rijbewijs ta sigui. Tin di e lesnan cu ta tuma luga den forma digital.
