Parlamentario Eugène Cleopa ta di opinion ku nos sektornan mester yuda i sostene nos pais na momentu di krisis aki

136

Mundu ta den un guera ku COVID-19 ku ta un enemigu ku bo no ta mira i ku tin impakto grandi riba ekonomia. Un enemigu ku no ta hasi distinshon den kredo, kolo, nashonalidat ni kultura.  Banda di esei Kòrsou tambe ta konfrontá retonan grandi den nos ekonomia ku a yuda kondusí na deterioro sosial i situashonnan di pobresa ku ta birando ora pa ora mas alarmante.

Nos ekspertonan lokal tur a deklará ku e proposishonnan di Hulanda riba nos petishon pa yudansa finansiero ta hinka nos den mas pobresa den e sentido ku kièr forsa un komunidat pa entrega su outonomia i ku esei netamente ta hasi e klase medio huntu ku e klase mas marginá mas pober. Tur esaki nan riba argumentashon ku no ta kuadra ku realidat empíriko di e realidatnan di Kòrsou. Pues a lo largu ta nos tur den e komunidat aki lo wòrdu afektá di un òf otro manera ku e medidanan impone pa Hulanda di kual a dekretá “take it or Leave it”

E pregunta ta ku si nos mester dependé di solamente di Hulanda pa nos solushoná e problemanan serio ku Kòrsou ta konfrontá aktualmente. Ta bèrdat ku Gobièrnu no por fia ningun kaminda sin aprobashon di Hulanda i esei ta debí na e akuerdonan ku Kòrsou i Hulanda i kumbiní na 10-10-10 i ku ta ankra den e Rijkswet Financieel Toezicht.  E pregunta ta dikon sektor priva i spesialmente esun finansiero no ta saka un man i pensa kon pa di otro manera nos por haña fondonan finansiero via kanalnan internashonal ku ta eksistiendo mundialmente i sigur awor ku tin un sobr’é likides grandi serka basta entidat finansiero internashonal. Pero no einan so nos sektor finansiero mester ta konosí ku organisashon i personanan ku kier buta fondonan disponibel pa paisnan ku e COVID-19 a i ta afektando.

Den e mes un rosea aki nos mester para ketu seriamente na e balor stratégiko Geo-politiko ku prinsipalmente Kòrsou ku ta den porta di Venezuela tin i kon nos por benefisiá di dje. Banda di esei tin e posibilidat pa fia serka nos merkado finansiero loka mes tambel. Aña pasa entidatnan finansiero lokal a fia na kompanianan di utilidat lokal un suma total di mas o ménos 500 mion florin. A finansiá (fia na) un (1) kompania so 360 mion. Dikon sektor priva no ta saka man yuda Kòrsou? Tur aña bankonan ta bin splika nos fin di aña kuantu ganashi nan a hasi. Ganashi logra riba e merkado lokal ku yama Kòrsou. I esaki nos por kompilá i bai bek i establesé pa e delaster 30 aña òf mas. Nos sektor priva tambe por bin ku un Curaçaose Hervormings Entiteit kaminda nan ta struktura uso i pago bek di e sèn ku a lo largu Gobièrnu lo disponé di dje.

Anto esei sin ku ta na nodi pa nos pèrdè nos alma i nos orguyo i òf nos propiedatnan manera e proposishonnan di Knops si ta kondusí na dje. Finalmente guera ku paisnan a gana ta esnan ku komunidat  a logra di uni tur habitante chikí òf grandi i pober i riku. Ban purba hasi esei kaminda esnan mas fuerte finansieramente ta yuda aportá ku mas profundidat  na nos komunidat ku yama Kòrsou.