Aña pasa a drenta e grato noticia cu e programa di Formacion Social (SVT) a cuminsa cu trayecto pa hende muhe tambe, esaki despues di dies aña cu e programa aki tabata disponibel pa hende homber so. Asina e aña aki atrobe a habri inscripcion pa un dis dos grupo femenino completa e trayecto aki.
Jessica Ras, coordinador di Formacion Social a conta cu inscripcion a habri caba y tur hoben femenino di 18 aña te cu 25 aña por inscribi y tambe mester padece sea un paspoort Hulandes of un permiso valido. Esey ta pues e rekisitonan pa por participa den e programa. Den cuadro di esaki, nos di 24ora.com kier a tende for di e propio cursistanan kico nan experiencia ta den e programa di Formacion Social pa hoben femenino.
Asina Alexandra Thiel, cursista den Formacion Social, a conta cu su experiencia tabata “excelente”. El a dicidi di participa den esaki di su mes y e no tin nada di keha. El a sigui conta cu prome cu el a drenta den e programa e tabata anda “riba caya” y sigur ta recomenda otro hoben pa forma parti di esaki y a describie como un “experiencia hopi nechi, ami lo recomenda tur e mucha muhenan, tur hende cu ta eyfo cu ta willing pa bin, djis bin p’e pasobra e ta algo hopi nechi”, agregando cu esaki tabata e miho experiencia di henter su bida.
Na su turno, Jenny-Lee Martir tambe a conta cu el a drenta di su propio boluntad y a reta su mes pa drenta e trayecto di militar y e tabata hopi dushi, a pesar cu e prome lunanan tabata poco dificil. Prome cu participa den e programa di Formacion Social, Martir a termina su educacion di EPB Horeca.
Tambe Sharisma Romney, mama di dos yiu, a conta cu el a drenta e programa pa haci su yiunan orguyoso y su experiencia tabata uno ameno y a gusta e disciplina cu el a gana den esaki.
Pa un relato mas amplio, les abo proximo edicion di TREMPAN.
