Lider di CURPA, Eric Ras riba situacion di gasolin. Gasolin a subi atrobe y probablemente lo bolbe mira un aumento den e proximo dianan. Den un entrevista minister di economia Geoffrey Wever a confirma loke nos a bin ta anuncia, esta cu gobierno ta riba un schaakmat. Su argumentonan pa hustifica e aumento di prijs di gasolin no ta convence ningun hende.
Pa colmo e minister tambe kier sconde tras di CAFT. Locual cu nos no por descarta cu pa final di aña prijs di gasoline lo por alcansa Awg.4,= pa liter. E efecto di aumento di gasolin lo haci cu tur prijs di tur otro cos lo bay subi. Esnan cu ta biba di un onderstand, un solo pensioen di behez y esunnan di minimumloon no por carga mas e aumento di costo di bida.
Locual cu nos lo mira den e dianan nos dilanti ta mas problema social.
Gobierno tabata tin tur oportunidad di mundo pa hedge ora prijs di crudo tabata abou. Awor aki nos ta hopi laat caba. Esaki ta haci cu lo bay tin aumento di prijs di awa y electricidad entre 30% pa 40% sigur, pasobra WEB lo no por carga e peso ey mas. Nos ta kere cu gobierno ta aplica e lema di world economic forum cu ta bisa: You own nothing and you will be happy/ lo bo no tin nada y lo bo ta contento.
E gobierno a core campaña cu: A studia e materia y cu tin solucion! Esaki a bin resulta un gran engaño na pueblo di Aruba.
Nos finansas publico ta na werki apesar cu gobierno a bin cu su medidanan di BAVP, cu a ricibi mas entrada pero ta goberna nos pais manera un bari sin bom. No tin un maneho y no tin un vision cu otro palabra tin net net nada. Cu un gobierno asina na mando e unico cos ta spera pueblo ta mas medida y mas miseria. Esaki ta e consequencia di un gobierno socialista comunista.
Tin placa pa tur otro cos pero pa trece un alivio pa pueblo no tin.
E aumento di entrada extra den caha di gobierno a base di medida no a bay pa paga debe sino pa otro cos. A aumenta goederen en diensten cu 39 miyon, aumento di 40% riba huurmento di edificio y aumenta e gastonan di personal di gobierno cu 15 miyon. Empleadonan publico keto bay mester entrega 12.6% di nan salario cu e promesa falso cu nan lo recupera locual cu nan a entrega. Nos tin un presupuesto 2022 cu deficit grandi den dje y ta haci cu nos debe nacional ta sigui crese y ta riba 6 biyon florin.
E VUT manera cu gobierno ta bin cu n’e lo no bay baha e gastonan di gobierno pa locual cu ta trata e gasto di personal di gobierno. A laga traha un rapport for di 2018 cu te dia di awe no a wordo trata den nos Parlamento pero ta wordo usa riba e contricantenan politico di e gobierno aki. Cierto hende ta haya nan promocion di anochi pa di dia y otro mester bay huez pa asina haya nan derechonan. Esaki ta e manera di opera di e gobierno aki pero cu actitud aki nan ta coba nan propio graf.
Un gobierno cu ta sigui fiesta y ta primi pueblo den su herida lo tin su final. Producto den tienda mes tin un fecha cu nan ta caduca. Asina tambe e gobierno aki tin su fecha cu lo caduca. E partidonan politico aki cu no tin respet pa ley nan di Dios, nan dia lo yega cu nan lo desaparese. Ningun hende cu ta burla di Dios lo sali ileso for di dje. Nos rosea di bida ta den man di Dios. Awe bo por t’ey pero di mayan bo no sa. Mi ta kere cu aki na Aruba ainda tin hende cu curason puro y cu ta kere den Dios. Laga nos no perde speransa. Dios lo bay sorprende nos. Penado lo no pena pa largo. Tur cos lo wordo expone na claridad.
