Awe mainta algo despues di 9:00 am a cuminsa drenta yamada for di varios bario indicando cu nan a perde suministro di coriente. Hopi hende a pensa cu ta un blackout atrobe, pero danki Dios esey no ta e caso. Mas bien ta e substation di NV Elmar na Tanki Leendert a bay plat.
E barionan afecta ta Tanki Leendert un parti, Oranjestad un parti y Noord un parti. Door di e interupcion, varios radio emisora cu tin nan antena den e areanan afecta, a bay fo’i aire.
Tabata diasabra 3 di juli ultimo cu WEB a haya problema y consecuentemente a experencia un blackout total den suministro di coriente na Aruba. Su mañan diadomingo atrobe coriente a bay, pero a bisa cu tabata problema cu NV Elmar. Y asina e dianan cu a sigui constantemente tabatin problema cu suministro den un bario of otro. Pa tur interupcion tabatin un splicacion pero e realidad ta cu e inconveniencia constante ta fada cliente.
Te ainda no a menciona kico a pasa na e substation na Tanki Leendert pero entretanto a cuminsa suministra coriente atrobe na e areanan afecta.
