E campeonato di Division Honor 2019/2020 di Arubaanse Voetbal Bond (AVB) ta inicia diasabra anochi entre United y RCA. AVB a tene un “technical meeting” cu e teamnan di Division Honor y a tira lot pa mira con e schedule lo ta.
E preparacionnan a bay bon, cumpliendo cu reglamentonan di overschrijving, pidimento di retiro.
Ing. Richard Dijkhoff, presidente di AVB, a expresa cu a pidi alrededor di 200 retiro, pero no ta tur a keda traspasa. AVB a haci tur trabou administrativo, prepara tur cos, traha carnet, haci posibel cu e hungadonan cu si a bin na remarca pa cambia di un team p’e otro si tuma luga. AVB ta wardando pa diasabra yega y cuminsa cu e campeonato. Nos ta premira cu e campeonato lo bay ta uno interesante, mirando cu e team nobo United di Noord pa prome biaha den su existencia ta yega Division Honor. Aki por mira cu e clubnan ta prepara, unda a repasa e ultimo detayenan p’e campeonato.
Awo ta bezig cu e proceso di “licensing” y si e clubnan no cu e exigencianan di esaki, nan no lo haya permiso pa participa den e campeonato. Tur esey a yuda e teamnan enormemente pa haci e preparacionnan. Mara na e “club licensing” e clubnan mester a cumpli cu cierto exigencianan prome cu 1 di Juni. AVB hunto cu CONCACAF a dicidi di hala e fecha un tiki mas cerca, pero a yega un momento cu tur mester cumpli cu e exigencianan. Tur esey a yuda nan pa ta prepara trempan pa nan sa con nan team ta hinca den otro.
E parti di infantil y hubenil a inicia caba y e ta draai. E Copa Don Elias Mansur a termina e weekend cu a pasa, kiermen e teamnan ta den training. Y di mira e resultado, awo ta preparando p’e campeonato cu ta bay inicia.
AVB ta invita e fanaticada di futbol, despues di e periodo di vakantie, y awor e campeonato ta bay cuminsa atrobe cual ta bay te cu December. Lo bay tin futbol infantil, hubenil y grandi. “Abo cu ta gusta futbol yega stadion y apoya bo team.” Manera cu a haci den añanan anterior, e teamnan di Division Honor un biaha mas lo bay tin e entrada di portanan. Esaki ta nifica cu si bo ta fanatico di un di e teamnan di Division Honor, yega stadion paga bo entrada cu ta bay directamente p’e club.
Lo bay tin un apertura, e campeonato aki lo ta dedica na 3 persona cu un trayectoria hopi largo den futbol. Yega diasabra awo pa mira ken nan ta, pero tambe apoya bo team y futbol en general na Aruba.
