Despues di hopi carta, hopi reunion y tanto critica den comunidad, awe tabata asina leu cu Minister Dangui Oduber a dicidi di manda informa Stichting Onroerend Goed Aruba, SOGA, cu ta nan intencion pa stop di paga pa huur di Hospital y pa entama un caso legal contra e fundacion. Meta di e caso ta pa forsa SOGA pa nan tuma e medidanan necesario, kisas tambe caso penal, contra e contratista OHL/Arellano. Parce cu Dr. Horacio E. Oduber Hospitaal tambe ta evaluando pa tambe entama un caso of pa uni na e caso di Gobierno, siendo e huurdo di e edificio y kende ta pasando dor di tur e problemanan pa posibel fayo den construccion of calidad inferior di e trabou realisa pa e compania Mericano y esunnan di Aruba.
Tabata obvio awe cu Minister Dangui Oduber no tabata contento cu e desaroyonan tumando luga na Hospital. Ayera ainda e tabata den reunion cu Hospital, pa purba intermedia entre sindicato y gerencia, pa problemanan constante cu tin den e edificio, di cual e trahadonan ta sinti cu ta basta. Hasta Mediador di Gobierno ta envolvi den e proceso aki. Awe mainta ta lanta cu e Hospital bou awa pa motibo di awasero y tuberia cu a rementa y causa hopi daño na ekiponan y mueblesnan.
Loading...
Reload document 
Open in new tab Hospital a tira serbete den ring
Awe mainta e Director di Cuido di Hospital, Ezzard Cilie, a duna di conoce cu el a manda un carta pa Minister Oduber den cual e ta pone e mes responsabel pa locual ta sosodiendo den e edificio. E como Director di Cuido no por asumi un responsabilidad si e no tin control ni riba SOGA ni riba e contratista. Como tal, el a laga esey na Minister Dangui Oduber pa e asumi e responsabilidad, como Gobierno di Aruba, den e asunto aki. “Ami no por mas”, asina el a bisa awe mainta cu un bos rabia y obviamente bastante fada. Ta tur siman nan ta sinta na mesa cu SOGA pero e relacion no ta bay ni un paso dilanti.
Ken ta responsabel?
Pa awor, Gobierno kier un persona asumi su responsabilidad den e asunto aki. Ta basta cu scondemento tras di funcion, tras di fundacion of tras di lessenaar. Mester tin hende cu ta na cabes di e proyecto aki pa sali dilanti y splica kico ta pasa, ken lo paga pa e dañonan y mas cu tur cos, ken lo percura pa corigi e erornan den construccion. No por ta asina cu tur siman cosnan ta kibra eyden. Ta hopi placa e inverti y ta hopi placa Gobierno lo mester paga na huur tur luna pa un edificio cu ta mustra di ta traha cu material inferior y/of uzando “mano de obra” sin experiencia den construccion di un Hospital mientras cu e ta den operacion.
Proyecto di riba 250 miyon florin
E doño di edificio di Hospital ta Stichting Onroerend Goed Aruba (SOGA), kende a percura pa financiamento, pa maneha y mantene e edificio nobo pa 25 aña largo. SOGA ta partner cu AIB-Bank, cu ta conta cu sosten di 18 instituto financiero local y internacional pa cera e suma total di 252.7 miyon florin, cu ta inclui gastonan di construccion, 4 aña di supervision, compra di e edificio actual, pago na arkitecto, preparacion y hopi mas. E construccion ta den man di OHL Arellano Construction Company di Miami cu tin como partner local ALBO Aruba, Bohama, AWM Caribe, Croon y C.H.S.
SOGA, funda na juli 2005 y maneha pa AIB-Bank ta e fundacion cu ta doño di e edificio di Hospital. Meta di SOGA ta pa construi y mantene edificionan pa Gobierno. E prome tres edificionan di SOGA tabata e oficina di Impuesto y Departamento di Finansa situa na Camacuri, tambe e oficina unda Aruba Tourism Authority ta situa riba L.G. Smith Boulevard y e edificio di DOW y DIP na Wayaca. SOGA no ta solamente construi, sino tambe mantene e edificionan.
