Otro aña Aruba ta conoce eleccion pa mira kende lo ta e proximo prome minister. A puntra e prome minister riba e garantia cu no lo bin cu un “afscheidsbeleid.” Cada minister ta pendiente cu e aña aki nan por ehecuta vision y proyecto, pasobra otro aña esey no ta posibel.
mr. Evelyn Wever-Croes, Prome Minister, a splica cu awo a drenta mei y otro luna, esta juni, ta net un aña prome cu eleccion. Ta poni cu eleccion di otro aña ta tuma luga na final di juni. Tin regla, procedura y hurisprudencia, di cual e mandatario ta kere esey ta esun principal.
E hurisprudencia na Aruba ta indica cu cierto decision tuma na final por ta cuestiona p’e siguiente minister. E mandatario a splica cu si bin un minister nobo, y ta mira bek cu “dos luna pasa esun prome cu mi a cera un contract.” Como minister nobo e ta mira si ta sigui cu ne of no.
Wever-Croes a indica cu na momento el a drenta como minister, su persona a topa c’un meneer riba payroll di Eman cu tabata gana diescinco florin pa luna. E persona aki ningun dia a aparece na trabou. “E no ta traha pa mi. Mi no sa kico el a haci pa señor Eman. Pero e tabatin un contract di seis luna ainda, cu a pasa e periodo ey.” Segun e mandatario, el a dicidi cu no mester di e persona ey. P’esey el a purba di kibra e contract y no a logra, mirando cu e tabatin un contract hopi duro cera.
Como minister, e ta bay bek pa mira kico esun anterior a tuma decision. Incluso el a topa cu algun decision cu no tabata malo y a continua, pero no ta tur a continua e ora y e ta depende. Esey ta loke ta yama “afscheidsbeleid.” Corte ta aplica, “hanter” un periodo di tres luna. Esey ta significa cu tres luna prome cu eleccion nan mester ta cauteloso cu e decisionnan.
Esaki ta e ultimo aña cu en realidad cada minister por ehecuta su vision, su proyectonan. Asina cu aña bolter ta drenta den aña di eleccion. Esey ta pone cu no por haci hopi cos, pasobra esakinan ta cosnan cu ta core riesgo. Nan ta tene cuenta cu ne y cada minister ta na alerta pa no mara futuro gobernacion n’e cosnan cu probablemente por ta kibra por ehempel door di hurisprudencia.
