Último tempu Frakshon di MAN a bin ta tuma nota ku e kompania di transporte públiko Auto Bus Bedrijf (ABC) ta konfrontando un situashon finansiero delikado i ku posiblemente mester hasi kambio i adaptashon den nan maneho.
Den e kuadro aki, djabièrnè último, Frakshon di MAN, pa por haña un mihó bista riba e situashon di Auto Bus Bedrijf, a hasi un bishita di trabou na e kompania. Durante di e bishita Frakshon di MAN a haña un presentashon amplio di e tim di maneho riba kiko ta plannan pa ku futuro di ABC. Tambe frakshon di MAN a haña un bista di e situashon finansiero aktual. Un di e aspektonan ku Frakshon di MAN ta konsiderá hopi importante ta e parti di modernisashon di servisio duná na usuarionan. Sigur den e era moderno kaminda teknologia ta brinda hopi posibilidatnan.
Frakshon di MAN a keda enkantá pa tende ku pronto lo tin un app kaminda e usuario por mira presis kon leu e konvoi ta pa yega serka dje. Na final di e presentashon Frakshon di MAN a haña un rekorido pa tira bista den e garashi i tambe e sitio kaminda ta laba e konvoinan.
Pa frakshon di MAN, transporte públiko ta di sumo importansia i mester regla esaki pa e funshoná di forma optimal.. Frakshon di MAN a manda un karta pa presidente di Parlamento den kual ta hasi un petishon pa konvoká un reunion di komishon sentral den kual lo deliberá ku Minister di VVRP enkuanto di e situashon di e kompania di transporte Auto Bus Bedrijf (ABC).
