Nos ta yegando e temporada di eleccion, caminda cu un hende tin cu bay vota. Tin varios cos pa tene cuenta cun’e. Nick Kock, kende ta director di Departamento di Labor, a splica cu diabierna, dia 22 di September venidero ta dia di eleccion, unda cu pueblo ta bay vota pa eligi un Parlamento nobo. Por a mira cu e dia ta riba un diabierna, cual ta un dia cu normalmente hende ta traha. Tin un ley cu ta facilita e derecho di voto di e clase trahado. Esey ta e ordenansa electoral, cual ta facilita e derecho di voto di e trahado, kende tin derecho riba voto, door di obliga su doño di trabao pa dun’e minimalmente 4 ora di trabao liber consecutivo pa e por haci uzo di e derecho aki. E obligacion aki pa e doño di trabao, ta conta pa e momento, e periodo cu e local di votacion ta habri, cual ta di 8’or di mainta pa 7’or di anochi.
Di un otro banda, ley ta bisa, pasobra mester keda rasonabel cu e doño di trabao tambe, cu si e trahado kende tin derecho di voto y cu ta trahando riba e dia eynan, pero cu pa un of otro motibo, ya caba tin suficiente ora, por lo menos 4 ora pa vota, e ora ey, e obligacion di e doño di trabao pa dun’e cuater ora di trabao extra, no tey.
Tin hende ta bruha den esaki. Por ehempel un trahado cu ta traha di 8’or di mainta pa 12’or di merdia, entre 12 y 1 e tin su pauze y ta traha bek di 1’or di merdia pa 5’or di atardi. E trahado aki, e doño di trabao ta obliga pa of dun’e e parti mainta liber, esta esun di 8 pa 12, e ora e tin te cu 1’or. E tin por lo menos 4 pa 5 ora pa eherce su derecho di voto. Of ta dun’e e parti merdia, di 1’or pa 5’or. E ora eynan, e ta traha di 8 pa 12 y di 12 bay ariba e ta liber pa e por eherce su derecho di voto. Pero, ley ta bisa cu si e trahado pa un of otro motibo e dia eynan no ta traha of ta traha un cierto cantidad di ora so y door di esey e tin por lo menos cuater ora straight cu e por bay haci uzo di su derecho di voto, e ora e doño di trabao no tin obligacion pa dun’e e oranan liber di trabao.
Na Aruba, sector priva, ta traha hopi cu sistema di shift. Un trahado ta traha por ehempel na un hotel of hospital cu un warda di 7’or di mainta pa 3’or di atardi. E warda aki ta hopi conoci. E trahado eynan a traha full dia, pero e doño di trabao no tin obligacion pa dun’e 4 ora di trabao liber. Pasobra despues di 3’or, e tin ya caba por lo menos 4 ora pa bay haci uzo di su derecho. Finalmente loke ley aki kier salvaguardia ta cu e trahado, e clase trahado cu derecho di voto ta haya su chens pa bay vota. Si e ta traha, e doño di trabao tin obligacion pa coopera cu e oranan di trabao. Of si e no traha suficiente ora, e ora no ta necesario pa dun’e oranan extra. Basta e tin e posibilidad pa bay vota. Loke ta importante tambe ta den e derecho di voto aki cu e ordenansa electoral ta facilita nan, door di obliga e doño di trabao pa duna 4 ora straight pa vota ta, cu den Codigo Civil, ta regla tambe cu e 4 oranan aki cu e trahado haya di su hefe pa bay vota, e mester wordo paga. Aunke no e no ta produciendo, pero e tin cu wordo paga si pa esaki. Esaki ta duna e derecho di voto un realce extra. Por mira con importante e wetgever, esun cu a traha e ley ta, pa e derecho di voto wordo eherci. No mag di tin nada den caminda di e trahado, pa wordo stroba pa bay vota, ni den e tempo cu e mester haya pa bay vota, ni den su sueldo. Fin di luna e mester cobra normal. No mag di kita e 4 oranan aki. E combinacion di ordenansa electoral y nos Codigo Civil hunto ta haci cu e derecho di voto na Aruba, ta un derecho hopi fuerte.
