GLW Foundation hunto cu famia y amigonan di Shady lo organisa un radio-telethon pa asina recauda fondo pa por bay Hulanda cu Shady pa en busca di su salud. Situacion na nivel mundial no ta mucho bon y aki na Aruba tampoco, pero famia di Shady tin fe y speransa cu nan angelita ‘Shady’ lo haya su salud bek. E radio-telethon aki lo ta dia 29 di augustus.
Shady ta un hobencita di 9 aña y for di baby ta sufri di sangramento fo’i nanishi. Te cu 4 aña dokter di cas tabata considera sangramento di nanishi algo normal. Dokter di cas a mand’e KNO arts y aki specialista a vries cierto ader den su nanishi. Desde e momento ey, Shady su sangramento a bira pio. Shady tabata sangra via orea y te hasta su awa di wowo. Cu 6 aña Shady a cuminsa ta cay flauw y semper manera e sangra su curpa ta haya mancha blauw.
Cu 6 aña tur 2 KNO arts a trata Shady y bolbe ‘coba’ den su nanishi. Aki ta unda tur cos a bira un nachtmerrie. Shady tawata sufri di dolor di cabes fuerte, sin forsa pa cana y tawata bay flauw y sangra mas hopi. Te hasta e tabata scupi clomp’i sanger grandi for di den su boca. Shady a biaha na comienso di 2019 pa Colombia y aya a haya sa cu e tin Von Willebrand Factor 8. Shady su anemia tabata na un drempel peligroso. Shady a haci un succion di su medula osea (beenmerg/bonemarrow)y algun tratamento extra. Ora el a regresa Aruba despues di tres luna Shady a haya sintoma nobo, por ehempel dolor di cabes cu e ta bay flauw, tur su jointnan ta haci dolor, boca malo cu blaar, keintura diripiente.
Su pediatra a cuminsa sospecha riba diferente tipo di enfermedad pero tur su testnan di sanger tur tawata sali bon. Dus dokter a bisa famia cu Shady lo mester bay den exterior pa test avansa, pasobra ta duidelijk cu Shady tin un malesa cu ta afecta su sistema inmunologico, pero aki na Aruba no por saca afo ki sort’i malesa Shady tin. Famia y algun amigo riba nan mes a cuminsa busca ayudo door di organisa cierto fundraising y aki a bin logra haya poco fondo pero ainda falta mas, mirando cu e gastonan ta core riba mas cu 50 mil florin.
Esaki ta motibo tambe cu GLW Foundation lo organisa un Radio Telethon dia 29 di augustus for di 10:00am te cu 6:00pm, pa asina recauda e suma cu falta ainda pa Shady por bay Hulanda en busca di su salud. Famia falta ainda mas of menos 12 mil florin pa yega na e suma pa Shady mester pa realisa e biahe. Idea ta pa logra yega na e suma aki, e aña aki ainda.
Rib’e dia aki lo tin un ‘koffiemorgen’ di 10:00pm te cu 1:00pm, unda cu lo tin koffie, te, juice y tambe baki di bolo pa 12,50. Si ta desea pa reserva un bak’i bolo por yama 5616151 of 7417417 pa reserva. Merdia lo tin benta di pan cu hotdog, pastechi, hamburger, croquette, chips. Tambe lo bende sop’i galiña, sop’i pampuna, sop’i carni pa 10 florin, cu juice, refresco, malta etc.
Ta haci apelacion na cualkier comerciante cu lo ta desea di duna su contribuicion financiero lo por manda un donacion pa GLW Foundation, Brikstraat 27, cuenta di banco CMB 612 50 903 cu e cantidad desea. Tambe lo por pasa e dia di Radiothon y haci entrega di esaki den un forma simbolico. Rib’e dia aki tambe, entre 10:00 am pa 6:00 pm por yama na telefon 5825500 y haci cualkier donacion. Un famia of representante lo pasa dialuna busca e donacion.
Fe ta grandi cu lo logra y sigur cu bo aporte lo yega e meta poni pa asina e chiquitin aki por bay busca su salud na hulanda .
Tur ayudo ta mas cu BON BINI y ta altamente aprecia, si mester mas informacion por yama George Winterdaal na 5616151.
