Ministerio di Finanza ta recorda riba e incentivonan cu gobierno a introduci y cualnan a drenta na vigor dia prome di januari ultimo. Ta trata specificamente reduccion di tarifa di impuesto pa importacion di material di construccion y reduccion tarifa di impuesto riba salario y entrada.
Pa por enfrenta e efectonan di COVID19, Minister di Finanza Xiomara Maduro, a anuncia na april e pakete di Alivio Fiscal 1 y na november ultimo a anuncia e pakete di Alivio Fiscal 2 cu ta consisti di 11 incentivo cu ta trece alivio na comercio y pueblo en general y ta reactiva economia di Pais Aruba. Na november Minister Maduro a indica cu tabata falta algun calculo ainda pa por anuncia dos incentivo mas, esta reduccion di impuesto riba importacion di material di construccion y rebaho di tarifa di impuesto riba salario y entrada. Tur trabou a keda finalisa y den un conferencia di prensa prome cu aña caba a anuncia cu e pakete di Alivio Fiscal 2 awor ta conta cu 13 incentivo pa reactiva economia di Aruba.
Desde 1 di januari 2021 ta reduci tarifa di impuesto pa importacion di material di construccion y ta reduci tarifa di impuesto riba salario y entrada.
“Construccion ta un actividad importante cu ta aporta na economia di un pais,” e mandatario ta bisa. Pa e motibo aki el a anuncia incentivo number 12 den e pakete di Alivio Fiscal cu ta un reduccion di impuesto riba material di construccion di 12% pa 10%. A firma e decreto aki den luna di december pa haci posibel cu desde 1 di januari 2021 e impuesto aki por conoce un reduccion di 12% pa 10%. E decreto gubernamental awor ta canando su caminda legislativo y lo tin forsa retroactivo te cu 1 di januari 2021.
Reduccion di tarifa di impuesto di salario y entrada
Minister Maduro a anuncia tambe incentivo number 13 cu ta e rebaho di impuesto riba salario (loonbelasting) y entrada (inkomstenbelasting) pa e prome dos tarifanan cu ta keda reduci cu 2%. Cu e reduccion aki tur trahado lo haya un alivio, pero principalmente e clase media cu un salario entre AWG 63.792 cu AWG 135.540 pa aña lo sali mas beneficia. E mandatario ta subraya cu e clase media ta esun cu semper ta absorba e subidanan y cu e incentivo aki kier yuda trece un alivio pa nan por keda cu mas placa den man. Cu e incentivo aki kier logra yuda e poder di compra pa asina por reactiva economia di Aruba. E decreto ministerial cu ta contene e tarifanan nobo di impuesto riba salario entrada ta publica bou number AB 2020, nr 207.
Minister Maduro ta gradici e profesionalnan na Departamento di Impuesto, Departamento di Legislacion, Oficina Estadistica di Aruba y Departamento di Finansa, kendenan a traha hopi duro durante e ultimo dianan di aña 2020 pa por a logra keda cla cu e dos incentivonan prome cu e aña caba. Minister Maduro kier recorda cu “ta nos tur mester yuda y traha hunto pa nos por surpasa e crisis aki. Ta nos forsa di coherencia ta nos fortalesa pa reactiva economia di Pais Aruba.”
