Na october ultimo den oranan di merdia Aruba tabata riba’bou. A drenta melding di un bom. Algo cu no a scucha pa hopi aña. Awe ta resulta cu e persona responsabel pa e acto aki a bay haci un joke cu a Sali’e hopi caro. El a perde e trabou fiho cu e tabatin pa hopi aña.
Dominico Tromp tabata traha na Holiday Inn y, segun el a conta den corte, e ta custumbra di haci joke cu un colega di dje. “Nunca mi a pensa cu e joke aki lo yega na consecuencia asina leu,” el a bisa diahuebs merdia den corte.
El a yama su colega operator y a bis’e “there’s a bomb in the office”, refiriendo na unda cu nan ta traha. Y el a haci e yamada for di e mesun hotel.
El a ripara cu a tum’e na serio ora cu el a mira hende ta core. El a bay pa bisa su amigo y colega cu ta un joke, pero e momento ey su hefe a yega y a push’e pa bay pafo. “Mi a spanta y e palabranan no por a sali di mi boca mas,” el a bisa.
Algun dia despues a deten’e y el a acepta mesora. Fiscal a pidi castigo den forma di trabou pa comunidad. “Loke cu bo a haci ta serio,” fiscal a bisa e acusado. El a splic’e cu Aruba ta depende di turismo y loke el a haci of a afecta e experiencia di e turista riba e isla. Y e hotel tambe a sufri daño cu esaki.
Na final el a pidi un castigo den forma di trabou pa comunidad, esta 30 ora.
Hues a dicidi di dicta sentencia mesora y a bay di acuerdo cu e demanda di fiscal. “Mi no por keda sin duna un castigo pasobra loke bo a haci ta un delito,” el a bis’e. A bay di acuerdo cu e 30 ora y como cu el a pasa un dia cera, a kita 2 ora. Pues na final e lo mester haci 28 ora di trabou pa comunidad. Me4sora el a bay di acuerdo cu e castigo aki.
