Manera nos a raporta, Aruba Airport Authority mester a tuma e decision di cera aeropuerto diahuebs mainta pa algun ora, debi na problema di sistema di airco cu no tabata trahando. Esaki a pone cu avionnan no por a baha. Pa 12:30pm aeropuerto a informa cu nan a adapta nan orario di habri, y tur facilidad y pista a habri bek. Esaki sigur no a cay den bon tera pa algun pasahero. Nos a combersa cu un di nan cu a expresa su mal contento cu henter e situacion aki.
Robert Fulton tin 14 pa 15 aña ta bin Aruba. Semper e ta bisa e ta un caos ora cu mester bay cas bek pa Merca. “Mi no ta compronde dicon nan no por drecha e asunto aki. Cu tur e placa cu tanto hende ta paga pa bin e pais aki.” E turista ta sigui bisa cu e ta mira hopi mehoracion den otro areanan, pero den aeropuerto e ta expresa cu mester cuminsa haci algo pasobra cos no por sigui di e forma cu ta bayendo. “Hende ta kehando.
Nan ta duna nos awa y algo di come e biaha aki, pero despues ki bo ta bay haci cu hende cu tin cu bay baño y sali for di fila? Eynan nan tin un problema.”
Fulton ta haya esaki hopi lamentabel pasobra ta un isla asina bunita, no ta haya cu ta manera pa trata hende. Riba e pregunta si e lo sigui bin bishita nos isla despues di tur esaki, e ta bisa nos cu “Si nan no haci nada pa drecha e asunto aki y si mi no scucha algo miho, no.”
