E siman aki a tuma luga un tayer organisa door di dos studiante di Universidad di Aruba. E tayer aki tin di haber cu parti di nan estudio cu mester cumpli cu ne, y a tene esaki na Cas di Cultura.
Reportero Leo Geerman a combersa cu e dos studiantenan aki na final di e evento, cu a hiba e tema di adulto mayor.
Keila Helder, kende ta studiante na Universidad di Aruba (UA) ta splica cu e iniciativa a bin hunto cu su colega studiante na UA Nina Angela cu a pone un “leerdoel” pa nan stage. Den su caso e ta coriendo stage na Directie Ouderenzaken. Relaciona cu esaki a organisa un “nutrition awareness” den combinacion cu actividad fisico.
Helder a splica cu e workshop tawata enfoca riba directornan of representantenan di casnan di cuido, hunto cu algun cliente di Fundacion pa nos comunidad. Tawata presente diferente orador cu a duna nan presentacion encuanto e importancia di nutricion y actividad fisico.
E studiante a mustra cu area di cuido di nos grandinan ta forma parti di su estudio. E hoben a expresa cu semper e tin un aprecio grandi pa e adultonan mayor cu ta “cerca di su curason” y lo sigui haci esaki den futuro.
Giannina Angela kende ta coriendo stage na Fundacion pa Nos Comunidad y ta un studiante na UA, a splica cu durante e encuentro informativo a invita varios orador pa por elabora riba diferente tema relaciona cu nos adultonan mayor.
Angela tambe ta un persona cu tin hopi amor y dedicacion pa nos grandinan, Su persona semper tawata desea di bin cu “workshopnan” nobo dirigi pa adulto mayor y diferente “doelgroepen”. Ta hopi contento con e evento a bay.
Ta enfatisa cu trabao social ta un responsabilidad hopi grandi, por observa cu na Aruba tin diferente problema social cu ta enfoca riba nan, entre otro: salud mental y salud fisico.
Na final Angela a mustra cu e mensahe ta pa keda activo; purba na cana un poco minuut pa dia, si tin cos cu ta gusta haci manera: “word puzzle”, si kier sali bay un caminda haci esaki, tambe hungado bingo ta leuk. Tur e tipo di actividadnan aki lo stimula bo mente, y lo mehora e calidad di bida .
