P’esey mescos cu boso a ricibi, Cristo Hesus,e Señor, asina cana den dj’E, siendo firmemente planta , y awor edifica den dj’E y establece den boso fe,mescos cu boso a wordo instrui, y ta abunda den gradicimento.( Colosensenan 2: 6-7).
El a haci boso bibo hunto cun’E. Door di pordona nos tur nos trangreshonnan, door di cancela e certificado di debe, cu tabata consisti di decretonan contra nos,y cu tabata hostil pa cu nos. Y El a kit’e for di caminda door di clab’e na cruz. Y ora El a desarma e gobernantenan y autoridadnan. El a expone nan publicamente, door di triunfa riba nan pa medio di dj’E.( Colosensenan 2 :13-15).
P’esey si un hende ta den Cristo, ta un criatura nobo e ta: e cosnan bieu a pasa y a wordo haci nobo.( 2 Corintionan 5:17).
Laga nos permanece den e libertad cu Cristo Hesus a duna nos, y no bolbe bek den e mundo di inmoralidad, paranda, violencia, abuso, y malicia.
Esun cu E yiu a haci liber ,ta liber di berdad. Pasobra salbacion ta bini solamente di Cristo Hesus, pasobra ta Cristo a muri na cruz pa nos tur pa pordon di nos picanan.
E no a salba nos pa nos bay bek den mundo di maldad, no laga nos uza e libertad cu a costa bida di Cristo como libertinahe, y bolbe bek den caminda di scuridad, haciendo manera nos no ta balora e salbacion tan grandi, cu Cristo a duna nos.
Nos ta yama pa sirbi Cristo Hesus, y bandona tur clase di idolatria , di nos bida pasado, nos ta yama pa aparta for di maldad, huy for di caminda di inmoralidad , y por fabor no tenta Dios , no bay bek den lodo.
Pa hopi esaki ta un temporada di hopi tentacion, nan ta bisa den pueblo” caya ta yama”, pero e sanger di Cristo Hesus tin poder, pa libra hende di caya y di maldad, asina para firme den e bida triunfante cu Dios a duna nos, no bandona Señor.
Un temporada caminda hende ta bebe y lubida Famia, completamente, un temporada caminda hopi ta bay trabao burachi, of droga, nan ta sali di parada, pa parada, fiesta pa fiesta, pasobra e actividad nan ta un pega tras di otro, y hende por cuminsa bebe for di mainta tempran awe, te manece mañan cu Dios kier.
Nos no ta yama pa laga e diablo domina nos bida, pero nos ta yama pa laga Cristo tuma control di nos bida completamente, pasobra e mesun hende cu bo ta awe, lo bo ta mañan cu Dios kier tambe.
No benta bo curpa abao pa alaba e malvado, no destrui bo mes y bo famia, pasobra mañan cu Dios kier ta mesun famia bo mester , pasobra nan ta di bo.
Hopi hende den cayente di carnaval ta comete erornan cu despues di carnaval nan ta lamenta, pasobra nan a cay bao di dominio di e malvado, tin hende cu ta lamentando eror carnavalesco cometi den pasado te cu dia di awe, p’esey no laga e spirito diabolico aki influencia bo, y asina aleha for di caminda di Dios bibo.
Un fiesta di rebeldia y desobediencia na Dios, caminda mayoria hende mester bebe pa nan tin goso, of hopi mester ta droga pa nan tin goso, pero ta lubida cu e goso den Señor ta nos fortalesa.
Laga nos haci hopi oracion, pa Dios tene misericordia, pasobra e ladron ta bini pa solamente horta, mata y destrui. (Juan 10:10)
Sinceramente, Pastor Marcel Balootje.
