Dios ta duna nos rosea y forsa pa nos curpa por move y nos por haci tur locual nos mester haci fisica y mentalmente, pero toch tin hende ta pretende di exclui Dios for di nan bida keriendo cu asina ey nan por bay dilanti.
Decision tuma, caminda cu practicamente nos ta mira cu no tin consulta cu Dios, ni tampoco respet pa Dios su palabra, ta mustra claramente, cu hende ta purba di biba sin Dios.
Dios ta adverti esey den su palabra hopi cla bisando:
Si Señor no traha e cas,ta envano esunnan cu ta trahe ta traha cansa curpa, si Señor no warda e stad, ta envano e guardia ta keda lanta.
Lo no sirbi bo di nada pa keda lanta te laat,pa come pan di amargura, pasobra E ta provee pa Su Stima den Su soño.( Salmo 127:1-2),
Cristo Hesus a bisa Ami ta e caminda, E berdad y E bida, ningun hende por yega cerca e Tata sino ta pa medio di Mi.
Rechasa Cristo den nos bida, ta pone nos bida bira un bida doloroso, pasobra caminda no tin e presencia di Dios, maldad ta goberna.
Lanta un famia sin presencia di Dios den cas,ta nifica expone nos famia na tur clase di problema, pasobra Dios mester bini na prome luga den nos hogar.
Orguyo y arogancia ta pone hende lanta contra Dios,expresa nan mes contra Dios, y lo trece consecuencia grave cu ne, sin no bini un arepentimento.
Den e buki di Job capitulo 36:10-11 ta para skirbi:
Y ta habri nan horea pa instruccion,y ta ordena nan pa comberti di maldad. Si nan tende y sirbie, nan lo caba nan dianan den prosperidad, y nan añanan den felicidad.
Ma si nan no tende, nan lo aparece pa medio di spada,y nan lo muri sin conocemento.
Ma esun cu no tin Dios den su curason ta montona rabia, nan no ta sclama na Dios pa yudansa ora cu E ta mara nan. Nan ta muri den nan hubentud, y nan bida ta caba entre e Sodomita nan.( Job 36:13:14)
Tene cuidao pa furia no tenta bo pa haci bofon.( Job 36:18)
Bo rikesa of tur e forsanan di bo poder, por a warda bo di angustia? ( Job 36:19).
Lus di e husto ta briya cla , ma e lampi di e malvado ta paga. ( Proverbionan 13:4).
Esun cu ta cana den rectitud, ta teme Señor, ma esun cu ta perverso den su camindanan ta despreci’E.( Proverbionan 14-2).
Ta dolor pa scucha expresion for di boca di hende, cu ta rechasa Dios, pasobra nos ta corda locual Hesus a bisa , cu esunnan cu neng’E aki na tera , E tambe lo nenga nan dilanti di Su Tata cu ta den cielo.
Hopi hende no kier reconoce cu nan actitud y nan boca ta cera porta di bendicion pa nan mes.
Lamentablemente hopi di nos hobennan no ta na altura di esey , pasobra nan no a wordo instrui door di nan mayornan, y nan ta pensa cu manera nan ta biba y haci tur cos ta sali nan bon, pero esey no ta e berdad, dia pa dia nan ta ricibi sorpresa amargo.
Esun cu anda cu hende sabi lo ta sabi,ma un compañero di hende bobo lo sufri daño.( Proverbionan 13:20).
Pobresa y berguensa lo bin riba esun cu neglisha instruccion, ma esun cu ta haci caso di coreccion lo wordo honra.( Proverbionan 13:18).
Arepentimento ta pa tur hende, y Dios ta pordona tur pica, ora hende confesa di henter nan curason.
Sinceramente , Pastoor Marcel Balootje.
