Desde aña pasa SETAR ta trahando riba e implementacion di Fiber Internet den e districto di Savaneta y San Nicolas. Un infrastructura moderno di futuro cu lo brinda e clientenan un conexion stabiel, speed di Internet mas rapido y miho cobertura den cas pa conecta bo Smart TV, laptop, tablet, celular y otro aparatonan den cas cu ta conecta cu Internet.
Despues di casi 9 luna por mira cu e trabounan ta continua, tin hopi cliente satisfecho cu nan servicio nobo di Fiber Internet y IPTV pero no ta tur cliente ta conecta ainda. SETAR su meta ta pa traspasa tur cliente di Savaneta y San Nicolas den 2024. Actualmente SETAR ta bezig den e area di Mabon, Brazil y De Vuyst.
Tambe por a nota cu trabounan den Noord ta andando simultaneamente cu pariba di brug. Den Noord, SETAR ta bezig den e area di Sabana Liber, Kudawecha y Alto Vista. Intencion ta pa keda cla cu Noord p’asina poco poco otro districtonan tambe wordo cambia.
Ta urgi tur cliente cu por a ricibi un carta di SETAR Fiber pa traspasa pa e servicio nobo y no a hacie ainda pa tuma contacto cu SETAR di biaha p’asina evita di keda sin servicio. Cada luna SETAR ta bezig ta shutdown nodenan di su red di kabel TV den e areanan di Noord cu ta ful traspasa pa Fiber Internet y IPTV.
SETAR ta riba un mision pa conecta Aruba completo riba e infrastructura di Fiber, unda cu clientenan por experencia speednan di Gigabit. Nos lo sigui traha den fase y lo notifica y informa tur cliente debidamante na momento cu e districto yega na beurt.
