Parlamentario Alan Howell di Fraccion di POR a aproba e idea di Minister Glenbert Croes di Asuntonan Social y Labor, pa pasa e leu pa crea e fondo di Crisis Plan y pa aloca 34 miyon Florin reparti den dos aña (17 miyon pa aña). Howell ta aplaudi Minister Glenbert Croes y Gobierno pa a bin cu Crisis Social Plan.
Alan Howell a enfoca riba e parti cu den historia nunca a yega di pone e 4 sectornan importante di nos pais traha hunto como un solo team y pa un solo causa. Esakinan ta Husticia, Social, Enseñansa y Salubridad Publico conhuntamente cu mas o menos 16 fundacion.
Parlamentario Howell a pone enfasis tambe riba e diferente problemanan social cu tin na Aruba cu mester atencion profesional y rapidamente. Tambe Howell a pone atencion riba e parti preventivo pasobra si no ataca e parti preventivo fuertemente, e situacion lo bira mescos cu hiba awa pa lama.
Por ultimo Alan a haci un peticion na Minister di Asunto Social pa pone extra trahado profesional y mas oficina di Guia Social pariba di brug, mirando cu ta un so tin pa henter Pariba di Brug. Pariba di Brug tin hopi problema social y tin mester di su atencion y dedicacion nesecario. Minister Glenbert Croes a duna Howell rason y a priminti di lo cumpli cu su peticion dentro di corto.
Parlamentario di POR ta hopi contento cu e ley di Crisis Social a pasa unanimamente den Parlamento, dunando asina un sosten total pa uza e fondonan dedica na atende y busca e solucionnan necesario na e crisis social di nos pais.
