Tur caminda bo ta tende di derecho humano, derecho di mucha etc., locual mundo ta ofrece.
Pero esey no ta kita for di e deber di un mayor pa lanta su yiu den Señor, stima y coregi su yiu. Pasobra bo yiunan ta di Dios (Ezekiel 18:4 y Salmo 24:1).
Prome luga lanta bo yiu den Señor ta un mandato di Dios mes, pasobra asina bo ta habri porta di bendicion pa bo yiu. (Efesios 6:4)
Como mayor ta bo deber di stima bo yiu y den tur circunstancia para hunto cu ne y guia riba e bon caminda. (Colosenses 3:21).
Bo deber ta como mayor pone dak riba cabes di bo yiu, pone cuminda riba mesa y haci tur locual por duna bo yiu un crecemento sano. (1 Timoteo 5:8)
Pero awo ta bin e parti di moral y respet. No ta tur luga cu bo yiu hinca den su cabes abo como mayor por permiti bo yiu bay. (Proverbionan 22:6)
Pasobra tin luga cu ta promove inmoralidad bao di hubentud, cu mester ta controla. Caminda mucha gusta bay pero cu no ta sano pa nan.
Ora un mayor ta stima su yiu, e kier lo miho pe. Pasobra e mesun mucha di awe, mester ta un homber of hende muhe di respet mañan cu Dios kier. Integro pa henter su bida.
No ta cumbini ningun mayor pa laga cos bay fo’i man y despues tin gasto na psicologo.
No ta cumbini ningun mayor permiti nan yiu uza droga, pasobra segun e mucha ta crece e ta bira adicto.
No ta pasobra mayoria mucha den bario ta sinta na skin’i caya of banda di minimarket bo yiu tambe mester ta den e grupo.
Ta imposibel tambe cu bo yiu ta hinca henter dia riba su telefon, cu ni awa e no por coy pa su mes for di frishider. Tene cuenta cu e mucha no a nace digital y cu e tin di haci trabao den cas pa e asocia su mes cu bida di tur dia.
Palabra di Dios ta bisa pa nos coregi nos yiunan, esey ta nifica no laga nan pa nan cuenta. (Proverbionan 19:18)
Abo como mayor mester ta ehempel di respet den cas pa asina bo ta respeta. Pasobra tur locual un hende sembra e ta cosecha (Galatas 6:7-10).
Si bo cria yiu sin respet y cu un moral hopi abao, lo bo cosecha berguensa como mayor.
Ni polis, ni prizon tampoco Reclassering no por haci e trabao cu abo como mayor mester haci.
Nos ta bolbe ripiti e trabao di instrui y coregi un mucha ta deber di su mayor.
Nos tin hopi homber, pero poco tata. Ora tur homber cu tin yiu tuma e deber di tata na serio, anto hopi cos lo cambia na cas, scol, caya, etc. y tin hopi mucha cu lo sa kico ta obediencia.
Educacion ta cuminsa na cas y for di infancia di e mucha y esey ta e deber sano y sagrado di su mayornan.
Pastoor Marcel Balootje
