Fo’i siman pasa e trahadonan di Arutram a expresa nan malcontento mirando cu nan no a haya uniform. Segun tin di compronde, e trahadonan a indica cu debe nan un total di 10 uniform, seis carson y dos set di sapato.
Riba dje den ningun momento nan a nenga di traha. Sinembargo nan kier nan uniform, cual ta un derecho.
Den un articulo anterior a indica cu gerencia di Arutram/Arubus no kier sinta negosha cu sindicato, ya cu semper nan tin un excuus. E trahadonan ta sigui indica cu nunca nan ta sinta negosha, pasobra supuestamente e CAO ta mucho bon, segun e director actual, kende ta den Raad van Bestuur.
Esaki ta basa riba un carta cu e director di Arutram a manda p’e empleadonan di dicho compania, cu a haci un peticion na e compania estatal pa nan haya un tipo di compensacion of kledingtoelage y a base di esey lo traha e luna di december.
Pero, manera un medaya, tur storia tin dos banda y director di Arutram/Arubus, Eddie Mohamed a trece su banda riba e asunto aki.
E ta comenta cu tin un impasse chikito cu e trahadonan di Arutram. E impasse aki ta encerando uniform. Den un contracto colectivo, nan mester ricibi dos set di uniform pa aña. Esaki en berdad Arutram no a cumpli cu ne den 2021.
Motibo di esaki ta, e pandemia a dal Aruba hopi duro y e compania tabata haya subsidio di un contracto firma den pasado di APA cu un compania di barco crucero.
Director anterior di Arutram, a firma un contract cu APA cu a caba dia 31 di december 2018. Despues di esey Arutram no tabata ricibi e placa aki fo’i APA. Consecuentemente e placa ta saliendo for di e presupuesto di Arubus, cual ex-minister Chris Romero a palabra cu tin cierto fondo cu ta aloca den e fondo di Arubus pa loke ta Arutram.
N’e momentonan aki Arubus mes ta sufriendo bastante. Pero placa ta saliendo di Arubus pa Arutram. Arutram riba su mes no ta genera ningun fondo. Arutram riba su mes no tin placa. E trabao mas duro cu tabatin hunto cu e team di Arutram tabata pa percura pa ningun hende no perde trabao y pa keda paga e salario cu den tur e tempo dificil aki, cu a sigui cumpli cu ne.
Pa un cobertura mas amplio lesa e edicion di TREMPAN di mañan.
