Diahuebs atardi, partido MFK (Movemento Futuro Korsou) a emiti un comunicado di prensa, den cual directiva di partido ta informa cu tur minister- y parlamentarionan, manera ya a anuncia den prensa, a haci un test di droga, Esaki a tuma luga Medical Laboratory Services. Minister van Heydoorn a laga haci di dje na Laboratorio Clinico Continental na Colombia.
Manera tabata di spera, segun e comunicado, tur resultado a sali negativo.
Mientrastanto den curso di dia di diasabra, Minister Plenipotenciario Carlson Manuel, lo haci e test aki na Hulanda y despues lo comparti e resultado aki cu prensa.
A SIGUI ACCION DI PARLAMENTARIO MERCELINA
E echo aki a sigui e accion di e miembro di parlamento di PNP, Gwendell Mercelina, kende tambe a haci test di droga. E test tabata enfoca riba lastro di marihuana of cocaina den su curpa.
Su bishita na laboratorio ta un reaccion na tur posibel insinuacion den su direccion manera si el a uza droga durante un biahe di trabou pa Colombia. E acusacion a bin di su colega di partido y parlamentario Corinne Djaoen-Genaro.
Despues di haci su test, Mercelina a bisa cu e no tabatin mester di e test pasobra e conoce su mes. El a recorda tur hende prome cu el a bira politico, el tabatin un carera profesional.
Mercelina a enfatisa tambe cu su historial ta limpi, tanto profesional como personal, y a declara: “Mi no a uza droga ni lo mi nunca haci esaki. Manera politico progresivo y miembro di PNP ta esencial pa distingui. Nos mester bin na un discusion tocante moralidad den politica.”
Despues di e accion aki, partido na mando MFK, a yama tur su minister- y parlamentarionan pa haci un test di droga.
Directiva di MFK a enfatisa e necesidad di e medida aki. Den un declaracion di prensa, nan a menciona cu ta di suma importancia cu cada organisacion politico cu ta representa den Conseho di Minister of parlamento, haci e test aki pa mustra na pueblo di Corsou k nan lidernan ta limpi di droga.
Mientrastanto, test di Mercelina tambe a resulta negativo.
