Miembro di fraccion di MAS den Parlamento, Aquannette Gunn, a entrega un peticion n’e Presidente di Comision Fiho pa asunto hudicial, integracion y peticion, Alvin Molina, pa yama un reunion cu e presidente di Conseho Electoral, mr. Monica Kock.
Den e carta e ta splica cu durante e reunion di dia 19 di maart ultimo, e director di Registro Civil y Censo, mr. Sharyn Luydens, a indica cu den realidad, t’e Conseho Electoral ta esun cu mester duna un splicacion adecua n’e Comision Fiho pa Asuntonan Hudicial, Integracion y Peticion tocante e Landsverordering p’e cambionan den e Kiesverordering (Ley Electoral). Esaki ta pa garantisa privacidad personal di e votadonan y pa promove e desaroyo mas eficiente di e eleccion y posibel consecuencia y implicacion di esaki.
P’e motibo aki tambe, Parlamentario Gunn, ta haci e peticion pa esaki na cuenta y pa yama un reunion mas pronto posibel cu mr. dr. Kock, den su funcion como Presidente di e Conseho Electoral, pa e por duna un splicacion amplio n’e comision fiho riba e topico aki.
