Entretanto tur e sospechosonan envolvi ta liber caba y mas bien ta wardando e caso bin padilanti pa por scucha e demanda contra nan, pa nan por defende nan mes y despues scucha kico hues mes ta pensa di e caso penal. Si tur cos ta bon, a parti di e caso den dos.
E prome ta contra di esunnan cu a cumpra un prueba di vacuna falsifica. Esey ta un grupo grandi, specialmente trahadonan di un compania estatal cu a cumpra na grupo grandi. E tempo ey a pone como condicion cu esunnan cu no vacuna, no por subi tereno di trabou. Den un tempo record tur trahado a presenta cu un prueba, sin cu ningun hende a puntra nan mes con tanto hende por a vacuna pareu asina. A resulta cu nan tur a paga pa nan haya un prueba, sin cu nan a vacuna!
Diesun cumprado so!
Remarcabel ta cu di tur esunnan cu a cumpra prueba di vacuna falso, ta solamente diesun so Ministerio Publico lo hiba padilanti. Pa colmo, no como sospechoso tampoco, sino ta haci un areglo cu nan den un TOM-zitting. Pues tin hende ta papia di miles, gobierno ta menciona 800 caso, e ora ta con por ta posibel cu ta 11 hende so a core e malasuerte cu nan so mester paga castigo pa loke mas di 789 otro persona tambe a haci?
Tom-zitting
Na momento cu polis detene bo pa un delito penal cu bo a comete, e ora fiscal por opta pa yega na un acuerdo cu bo den un Tom-zitting. E palabra ta para pa Transactie Openbaar Ministerie. Mayoria bes ora bo haya un carta, e fiscal ta skirbi bo di ta desea di yega na un acuerdo cu bo sin pasa via un hues. Den bida real, lo bo atende un sesion na Ministerio Publico unda ta ofrece bo un “deal”.
Tres bendedo y falsificado
E di dos grupo ta esunnan cu a haci negoshi, gana placa bruto, cu bendemento di e pruebanan falso aki. Te awo ta papia di tres sospechoso cu lo mester presenta dilanti hues, pa e caso penal, programa pa tuma luga dia 9 di februari 2023.
