E gremionan di Aruba y Corsou a tene un encuentro hunto cu Fedecamaras riba e situacion di e frontera cu Venezuela y e efectonan economico cu esaki a trece cu ne.
N’e ocasion aki Vice-Presidente di Fedecamaras, Adan Celis tabata presente unda cu el a califica e reunion aki como uno historico ya cu nunca antes un reunion asina a tuma luga. E ta un evento special pa su importancia pa e islanan y Venezuela, pa e apertura di e frontera. Apertura di e frontera, pa e banda Venezolano semper tabata partidario cu lo mas importante ta libertad: libertad di empresa, libertad economico. Nunca nan tabata di acuerdo cu e cierre di frontera. E problema entre e pais- y gobiernonan nunca mester afecta e ciudadanonan.
Mas aleu, Celis a bisa cu e apertura di e frontera ta fundamental den varios aspecto: e aspecto economico y comercial. E aspecto comercial,di un banda, e productor Venezolano, por reactiva nan capacidad comercial inactivo di awendia, pa por bende nan productonan agricola y e frutanan.
