Den area di San Nicolas a bin topa cu un grupo di politico y activista di e partido berde AVP, kendenan tabata haciendo un recorido pa mira con nan por yuda. Mira con nan por pusha e bos di e pueblo y logro cosnan cu ta forma parti di un maneho cu San Nicolas. Awo ta sinti cu ta mas bien apoya riba iniciativanan priva y individual.
Parlamentario Mike de Meza tabata compaña pa e docentenan Conny Connor y Otami Thomasia, kendenan ta personanan cu tin nan bario den nan curason. Pero tambe tabata presente Terrence Ras, cu ta un candidato prospecto pa AVP y e ta mirando con como un comerciante lo por yuda su bario. Ya caba den luna di maart nan tabata na Lago Heights Hill Park unda a pone man pa drecha e cura den cual un vehiculo a dal den dje. Esaki tabata necesario pasobra aunke cu e parke ta mustra bandona, cu cantidad grandi di yerba birando mondi, e habitantenan ta uza esaki.
Tur e candidatonan aki di San Nicolas tabata na altura cu e edificio cu un tempo tabata di Don Bosco no ta den uzo mas. Pero e decadencia di e structura toch a impacta e cuater personanan aki, kendenan a expresa di no ta compronde di con no a haci nada cu e edificio.
Den pasado, despues cu a renoba e structura aki bou gobernacion di partido AVP, a haci uzo di e edificio pa uza como reemplaso. O sea na momento cu un scol bay pasa den su fase di renobacion of ampliacion, ta manda e studiantenan pa e ex-scol di Don Bosco. Esaki tambe tabata e prome sede di Colegio Arubano San Nicolas.
Ta resulta cu e edificio aki situa den Pastoor Hendrikstraat tin shete aña para, sin cu ta haci algo cu ne. Completamente bandona, de Meza a bisa. Y loke nan tin miedo p’e a sosode. E edificio aki ta birando un escondite of deposito pa adictonan ambulante y pa ladronnan, of personanan cu no tin caminda di biba. Asina a topa corchon bieu y un mashin di Aruparking horta na Playa. Esaki ta straño pasobra ta na Playa so tin e mashinnan aki y e ladron(nan) mester a haya ayudo pa transporta e mashin te pa San Nicolas.
“Tristo,’ tabata e comentario di e dos docentenan di San Nicolas, Connor y Thomasia, pasobra no necesariamente mester uza e luga aki como un scol. Na 2017 na momento cu un gobierno di otro asignatura a sinta no a uza e edificio aki mas. Y e unico uzo cu e tabatin cu a hala atencion tabata e curpa sin bida haya di un per4sona y e resto di un mashin di Aruparking.Vandalistanan so ta contento, pasobra aki nan tin un sitio pa sconde nan materialnan horta sin cu e doño di edificio haya sa.
Ta hopi hende di San Nicolas a bay Don Bosco Scol pa cual e tin un balor sentimental masha grandi mes,” Conny Connor a conta. E ta haya apoyo den e ponencia aki di su colega Otami Thomasia, aunke di un generacion mas hoben, sa di e storia aki door cu hopi hende cu e conoce a haya nan educacion na Don Bosco. Nan no por kere cu ta laga un edificio asina valioso bay perde. No necesariamente mester habri un scol nobo eynan. Pero pa su balor den historia di Aruba y San Nicolas, e ta un bunita recuerdo pa cual e por bira un facilidad di multi uzo en bes di lag’e bira un luga pa adictonan ambulante of pa delincuentenan hacie nan luga di biba of sconde nan fechorianan.
Terrence Ras, comerciante, tambe a expresa su preocupacion pa e situacion cu un edificio manera esaki y den e estado actual loke cu e por nifica pa e bario. Manera cu e ta awo, ta cos malo so e ta trece, mientras cu “mi hendenan cu a bay e scol aki tin pensamento bunita di tempo di nan infancia.” Bario di San Nicolas lo bay mira mas di e bishitanan aki y por acerca nan pa cualkier sugerencia.
