No obstante tur esfuerso di Cuerpo Policial Aruba pa haci campañanan di conscientisacion pa no bebe y stuur, toch parce cu nada ta suficiente. Tur dia Polisnan ta topa cu chauffeurnan burachi tras di stuur, sin distingui entre hende homber, hende muhe y hasta hobennan. Diasabra manece diadomingo a detene no menos di 3 hende homber sea tabata tras di stuur of tabata drumi pa nan cuenta den auto of hasta band’i nan auto.
Como cu hopi biaha e detencionnan ta bira suheto na discucion riba red social, ta bon pa aclaria cu detencion di hendenan burachi hopi biaha ta pa proteha nan mes. Ora a skirbi e ley a sali for di e punto di bista cu hende burachi por cay of haci nan mes daño sin cu nan ta consciente di dje. Tambe nan por causa daño na otronan. Pesey eigenlijk bo no ta bay “cera”, sino ta hinca Bo den un cel pa bo mesun bon y asina bo wayaba pasa, ta laga Bo bay cas bek.
Den caso cu Bo causa un desgracia serio caminda contrapartido a keda seriamente herida of a fayece, e ora si Bo ta den un problema mas serio cu nos leynan penal.
Pesey ta importante pa, den caso bo ta sinti cu Bo no por mas cu Bo alma, pa Bo yama un famia of amigo pa busca Bo y hiba Bo cas. Esey semper ta mas sigur cu djis drumi den auto banda di caminda. Ley ta describi e acto aki toch como bo tin “intencion” di stuur, siendo e realidad ta cu Bo no ta na bo sano huicio.
E combinacion di foto y video adhunto ta tres detencion, e prome ta despues di 5:00am den e parkeerplaats na Orange Plaza riba Sasakiweg. A haya un homber drumi riba un stoel banda di su auto. Como cu e tabata “patapata” a opta pa hib’e bay drumi riba un cama mas sigur, aunke di beton, na Warda di Polis. Despues a topa cu un otro chauffeur burachi, despues di 8:00am den parkeerplaats di Certified Mega Mall. Den e ora ey no tin ningun bar habri eybanda. E homber a pega soño drumi den parkinglot di trempan, pa cual Polis a hib’e Warda di Polis pa e descansa e body, e di tres tabata “solosolo” pa 8:30am den parkeerplaats banda di edificio di Corte den John G. Emanstraat na Playa. A bay cu e chauffeur pa evita cu e ta lanta “wayaba” y stuur su vehiculo asina mes.
Asina por mira cu tres homber no a habri mainta na cas. Sea nan a bay fiesta di trabou of a djis rek un paranda, pero a mira mucho profundo den e glas di bebida.
