Wowo di ex-chauffeur di Gobernador a bira den marduga

2638

“Mi wowo a bira” asina e ex-chauffeur di Gobernador a conta nos marduga, pa mas o menos 3:15am ora cu el a pasa cu auto, dal den e baricadanan y despues subi un ser’i santo dilanti Fermin’s Bar, na e rotonde bou construccion na Boegoeroei, na Noord. E tabata biniendo for di Noord direccion Oranjestad y no a nota cu caminda ta cera.

E impacto tabata bastante fuerte y henter e “front” di su auto marca Hyundai modelo Accent color blauw, cu number A-58733, a kibra. Bumper tabata completamente los. E chauffeur a ricibi sla na pecho y a haya un herida na su brasa. Cu ambulance a transport’e pa hospital pa ricibi tratamento medico.

Na e sitio e chauffeur a sigura cu e no ta bebe alcohol, pues e no tabata burachi. El a sirbi servicio militar pa mas di 30 aña largo y a traha hopi tempo como chauffeur di Gobernadornan di Aruba. Awo e tin mas di 6 aña cu pensioen caba. El a splica Polisnan cu djis su wowo a bira y no a reconoce e area y cu e caminda tin simannan caba cera pa construccion di un rotonde.

Mainta, despues cu el a ricibi tratamento medico na Hospital, el a cana na pia bin Boegoeroei pa busca su auto bek. Ainda e tin hopi dolor. A regla pa Nagico Road Service takel su auto hiba cas pa e por decansa. Bisiñanan a conta cu esaki no ta e prome, cu ya caba otro auto a subi e ser’i santo eynan caba algun dia pasa.