Cu sumo placer Parokia Santa Filomena di Paradera ta presenta e buki ‘E spiel di 70 Aniversario’ un buki conmemorativo di e 70 Aniversario di Parokia Santa Filomena.
Den e buki aki e lesado ta haya un bista di e historia y e actividadnan di nos parokia. Den e diferente capitulonan a trata entre otro e historia di loke a pasa prome cu construccion di e misa, e desaroyo di e construccion di e misa, e pastoornan cu a eherce nan trabou den e parokia.
A dedica atencion tambe na tur e eventonan di e hubileo di 70 Aña. Cu hopi satisfaccion a compila tur e informacion aki pa asina duna e lector un bista amplio di e desaroyo di parokia di Paradera.
Na e momento aki tambe ta un bon oportunidad pa introduci y gradici tur persona cu a contribui di un manera of otro na realisacion di e buki aki.
Na e team di redaccion di Parokia di Paradera; Elvia Solognier-Croes, Jeanette Croes-Fingal, Sigfried Lumenier, Evelina Felten-Dania. Nos fotografonan; Mayra Croes-Croes, Lino Angela y Ayrton Tromp.
Tambe e colaboradonan: Pastoor Toti Fuentebella, Cerilio Croes, Glenn Gonzaga y tur miembronan di e comisionnan di parokia.
Un danki especial na e Team di Produccion di Xclusivo Magazine; Jacqueline Wernet, Johana Mejia, Carolina Castejon, Ayrton Tromp y Gerardo Perdomo.
Un danki grandi ta bai na Compra Ltd bou di direccion di Sr. Hubert Dirksz, kende ta e sponsor di e imprenta di e buki.
Mara cu e buki aki por contribui na e lectornan door di ofrece na nan un miho conocemento di parokia di Paradera su historia y desaroyonan actual.
E buki aki ta na benta tur dialuna te diabierna, menos di diaranson, durante oranan di oficina for di 5or pa 6’or y mei di atardi na oficina di parokia na Pastorie Paradera. E fondonan ta destina pa e construccion di e cas parokial.
