Diadomingo, dia 27 di october 2017, Fundacion pa Talento Musical “Donny Laclé” a presenta un biaha mas su Concierto Dominical den Café Musical den Biblioteca Nacional na Playa.
Manera semper e concierto ta tuma luga di 11.00 or te 01.00 or y algo mas di merdia y entrada ta gratis E mainta a cuminsa cu presentacion di algun alumno di Scol di Musica Rufo Wever. Prome alumno tabata e pianista Carienne de Cuba. Carienne a toca 2 sonatina Despues s sigui Justin Peña riba guitara. El a interpreta entre otro "Anochi na
Santa Cruz", un wals cu Justin mes a compone Como cu ultimo momento un studiante a cay afo, Catherine Provence y Rob Rijnbout a reemplac’e. Riba piano nan a toca "Ban bail'e danza", Padu Lampe y "Pensando en Ti" (wals), Rufo Wever. Aregla pa quatre-mains door di Rob Rijnbout. Un Ensemble chikito di Scol di Musica Rufo Wever,bou direccion di Johnny Croes, a presenta: "Sabrosita" di Rufo Wever.
Mientras e siguiente grupo tabata prepara e caha di glas a pasa rond. Durante e concierto di otro luna e Fundacion lo otorga 15 scholarship Ta saca e gastonan pa e scholarshipnan aki di e caha di glas. Coro La Escala , bou direccion di Héctor Pérez a continua. E coro cu ta consisti di 16 integrante entre musico y cantante. Nan a laga e publico disfruta di un variedad di musica popular di Aruba y di Latinoamerica, manera Shimaraya, Un potpuri di canticanan di scol, Doce Cascabeles, La piragua. E ultimo parti di e mainta aki ta den man di Tommy y su grupo, un grupo cu semper ta para cla pa toca. Un grupo tipico, bou guia di Tommy Figaroa, y alabes tocado di harpa. E grupo ta consisti ademas di 4 integrante reforsa pa integrantenan di Los 3, Nan lema ta: nos ta toca y boso ta canta y balia. Asina esnan presente a canta y balia na smaak y asina cera un mainta hopi dushi yen di alegria. E siguiente y ultimo concierto pa e aña aki lo tuma luga riba diadomingo 3 di december.
