Ku estreno di e pelíkula ‘Wonder’ ayera nochi den The Cinemas, Fundashon
Ride for the Roses por wak bèk riba otro evento eksitoso pa kuminsá rekoudá fondo. E
alrededor di 15 mil florin ku a rekoudá ayeranochi finalmente ta bai pa Prinses Wilhelmina
Fonds ku ta hasi asina bon trabou riba tereno di lucha kontra kanser i guia pa pashènt di
kanser i nan famia.
E pelíkula nobo Wonder ta e storia di un mucha hòmber di 10 aña yamá August ‘Auggie’
Pullman ku danki na sosten di su mayornan, ruman muhé, dosentenan, un amigu i un amiga ta
surpasá e retonan grandi ora e bai un skol básiko normal. Nan tabata tent’é pa su kara
desformá, loke ta resultado di numeroso operashon. E lucha ku e mucha aki a hiba ta demostrá
un tenasidat pa pasa den tur esaki. Su aseptashon ta total ora e skol ta honr’é na final di e aña
eskolar pa su méritonan spesial. E pelíkula ta bon pa famianan bai wak i bastante hende lo no
por kontené nan lágrimanan durante e sine.
E presentashon di e pelíkula aki, ku awe numa nan ta estrená na Merka mes, a tuma lugá den
dos sala di The Cinemas. Promé ku kada presentashon presidente di e fundashon Ride for the
Roses, señor Robbin Martina, a gradisí tur esnan presente ku apesar di tantu otro aktividat a
disidí pa bini i gasta mas plaka ku normal pa un sine, simplemente pa sostené e bon kousa.
Tambe a hiba palabra e hóben J-J Ayali di 12 aña, alumno di International School Curaçao, ku ta
asina fasiná pa e buki riba kua e pelíkula ta basá, ku el a lesa e buki numeroso biaha kaba. El a
kompartí ku e dos salanan bastante yen kuantu e gusta lesa i spesífikamente e buki aki di e
outor R.J. Palacio, loke ta un seudónimo di Raquel Jaramillo ku a saka e novela pa mucha aki na
2012. E na su turno tabata inspirá pa skirbi e buki aki pa e piesa Wonder di e kantante Nathalie
Merchant.
Ride, Swim & Walk for the Roses
E siguiente aktividat públiko ta dia 14 di yanüari ora tin e Sail for the Roses i e evento grandi
mes ta djadumingu dia 21 di yanüari ora ta spera atrobe mas òf ménos 10.000 partisipante na e
Ride, Swim & Walk for the Roses.
