Fundacion Pariba Boxing a tuma e iniciativa pa trece un coach internacional Aruba pa duna conseho na un grupo di trainer.
Den combersacion cu Presidente di Aruba Boxing Association, Nigel Nedd, el a splica cu riba e prome dia e trainer Rick Cadilha (Canada), kende ta un ex funcionario policial, a duna seminario diahuebs mainta un group di coach. Esaki ta pa hisa e nivel di trainernan local y organisa eventonan di un forma mas profesional.
E deseo tabata pa cada scol manda un participante pero na final nan a ricibi 8 docente cu a registra y participa den e seminario di e coach Canades. E parti aki lo tin un duracion di dos dia.
Tabatin un campamento tambe pa mucha cu ta algo cu e ta haya masha interesante. Esaki pasobra ta promove e deporte bou di e grupo aki. Hopi hende den comunidad no ta compronde kico boxeo amateur y e disciplina pa yega na bira un boxdo. “Loke mester haci ta bay den comunidad y introduci e disciplina aki na mas tanto mucha posibel. “ Ta trece nan den gym y mantene nan eyden mas tanto tempo posibel. “E muchanan di awendia no ta manera esunnan di antes. Mester provee luga sigur pa nan sinti nan mes bon.”
Aunke e campamento no a bay manera cu e lo kier “pasobra mi ta un perfeccionista, pero toch e tabata un exito,” tabata palabranan di Marco Dupersoy (coach di Aruba Boxing Association). E idea tabata pa hinca e seminario aki den comunidad, pa lanta e boxeo for di morto y crea interes cerca e hobennan.
E idea na final, el a bisa, ta pa laga e muchanan yega den gym y participa activamente den e deporte di boxeo. Pero e mester bira un programa continuo, pasobra e ta un forma pa crea ciudadanonan responsabel pa futuro. No tur hende ta bira un campeon mundial, pero e ta siña respet y disciplina den bida.
E eventonan relacion cu e boxing camp a tuma luga na IBiSa San Nicolas.
