Awe desde 2:00pm un grupo di trahado afecta dor di Covid-19 a bay para dilanti Sociale Verzekeringsbank (SVb) na Eagle pa reclama dicon nan no ta hayando nan placa di subsidio di salario of di FASE. Parce cu companianan ta abusa di nan trahadonan, dor di keda sin cumpli cu nan trahadonan, lagando nan den debe atras y sin pan riba mesa. Ta trata aki di trahadonan di e compania contratista Youth Contractor Aruba y Network.
Mayoria di e trahadonan tabata trahando na Barcelo Hotel & Casino. Locual ta sosode cu mayoria di e hotelnan no ta emplea trahado mas, sino ta laga contratista tuma nan den forma di “uitzendbureau” y asina por kita nan facilmente ora cu tin “low season”. Tur esaki ta pa evita cu ora hotel mester baha su gastonan, cu nan ta pega cu un cantidad di trahado den servicio directo, cu tur e beneficionan cu leynan laboral ta otorga e trahado.
Locual por a sinti na e sitio ta cu e doñonan di ambos contratista a haci un bon trabou den bruha e trahadonan di e reglanan di Subsidio di Salario y di FASE. A bruha nan dos den otro, aunke cu na final e trahadonan no a haya ni esun ni e otro. Den un di e companianan tin trahado cu a cobra y otronan cu no a cobra, locual sin duda a causa hopi rabiamento.
Un di esunnan cu nos a entrevista tabatin palabra di elogio pa e forma profesional con ir. Edwin Jacobs ta atendiendo e casonan, un pa un, su mes ta papia cu e trahadonan pa splica e scenarionan y e realidad cu tin pa cu nan caso specifico. Pero, e trahadonan ta bisa di no kier scucha splicacion mas, pasobra for di luna di maart nan ta sin entrada. Nan ta teme cu lo corta nan awa, coriente y no tin placa ni pa cria nan yiunan mas awo cu nos a drenta juli. Nan kier mira placa riba mesa y kier pa Minister Glenbert Croes cumpli cu locual el a priminti na e pueblo.
