Tara Prins, managing director di Tarina Hospitality PVA, cu tabata encarga cu Denny’s na Aruba, a duna su banda di medaya pa loke ta e ceramento di e negoshi y tambe expresionnan haci pa algun trahado.
Un di e trahadonan tabata basta skerpi diamars den prensa, indicando cu Prins lo tabata contra di e trahadonan. Pa esaki Prins a splica cu tur trahado ta local y no a pidi permiso pa ningun hende stranhero bin traha den Denny’s na Aruba.
Prins no sa kico exactamente ta loke e trahado a indica. Unico cos cu e por bisa ta cu a duna un hende un di dos oportunidad den bida, mirando cu tin algun trahado a yega di pasa den situacionnan fastioso den bida y ta haya jammer cu nan ta bin expresa asina.
Dicon Denny’s a cera
El a conta cu a cera e negoshi dia 20 di maart. Mester a cera esaki door di e situacion di Covid-19. Tabata tin algun dia caba cu Gobierno a pone cu mester a cera negoshinan na Aruba y a cana segun reglanan local y segun reglanan di e franchise.
Prins a splica cu a cera pasobra no tabata tin claridad tocante restaurantnan cu ta cera y seguidamente a duna prome posibilidad pa haci delivery cu take out so y esey lo tabata bay dificil pasobra cierto di e trahadonan cu ta laborando a menciona cu ta dificil pa nan por yega trabao cu bus, etc. den e prome fasenan di Covid-19.
Prins a splica cu e tabata tin trahado cu tabata traha on call. A tuma contacto cu DPL e tempo ey pa ta sigur ki tipo di contract por duna na diferente persona y nan a indica cu e personanan cu ta on call ta un contract riba nan mes, directo cu Prins mes.
Pago
Ta personanan cu no ta traha vast cierto oranan. Ora nan ta bin val in, ora cu otro trahado ta AO of si e restaurant ta yen ta bin traha algun ora extra.
Tur esnan cu ta riba payrol por pasa diamars 3’or di atardi cerca ccountant pa haya nan pago haci y tambe firma un termination agreement cu Tarina Hospitality.
Futuro di e franchise
A opera na Corsou y te awo a bin Aruba, pero desafortunadamente e crisis a bin aworaki. Prins a indica claramente cu nan no a cera na Corsou. Na 2007 a bende e hotel y franchise cu un compania Mericano. E compania Mericano a sigui explota e franchise e tempo ey. Denny’s na Corsou nunca a cera.
Tambe aworaki ta den un situacion cu nan no sa. Aworaki a para di funciona na e luga caminda nan ta y ta haciendo un evaluacon di e situacion. Den e dianan aki tur e puntonan aki ta wordo tuma na cuenta y wak kico ta bay pasa cu Aruba, cu e situacion di Covid y tambe di economia, con ta bay sigui. Tabata riba e strip na Palm Beach, caminda cu un gran parti di e entrada ta di turismo y ta mira cu lo bay cuminsa na Aruba cu un turismo hopi minimalisa compara cu antes. P’esey kier mira e prome simannan con esakinan ta bay desaroya na Aruba.
Mudamento of no?
A baha borchinan door cu a anula e contract cu e huurdo bisando cu no por sigui paga e huur mas y no sa ainda si lo bay muda, pasobra tin hopi ekipo y cosnan den e localidad ainda cu no a saca. Ta den un fase aworaki cu kier sinta wak precies y caba di trata cu e huurdo con lo bay sigui.
Prins a splica tambe cu nan a haci un soft opening pasobra tabata wardando pa haya e 24 oranan di gobierno. Tabata tin basta indicacion cu esey lo a cristalisa y cu te ainda no a haya esaki. Fuera di esey tabata tin un aña caba cu nan a habri y tabata tin un fiesta hopi grandi dia 8 di maart. A haya un cobertura total di hopi medio di comunicacion. E tabata un par dia hopi bon. Tabata henter un fin di siman cu a celebra e prome aña di Denny’s.
No sa dicon e pensamento cu a mira den media cu cos ta bayendo malo of algo asina, pasobra esey no ta cuadra cu realidad. Prins tampoco no tin debe, pasobra no a haci ningun prestamo na Aruba pa habri e negoshi. Esey tampoco no ta realidad cu a sali den prensa.
E debe di huur aworaki ta for di april cu ainda no a caba di negosha kico ta bay pasa door di e situacion di Covid.
Te ainda no a haya un beslag cu a pone riba e cuentanan di e compania. Prins no por duna un indicacion kico ta bay pasa. Te ora cu no caba di negosha, no sa kico ta e situacion y kico ta bay pasa cu esey.
Ta kere den Aruba
“Nos ta biba den un comunidad hopi chikito, vooral na Aruba. Tur hende sa historia di cada persona cu por a bin na television y bisa algo.”
Prins a agrega cu e ta kere den Aruba. E si ta kere cu Aruba ta un luga bon pa haci negoshi. Apesar e situacion di Covid-19 na Aruba cu ta bay ta un cos desastroso, no solamente pa Aruba, pero pa hopi isla cu ta depende practicamente di turismo. Ta mir’e na Corsou mes aworaki, cu tabata tin hopi turbulencia door di e situacion di Covid-19 cu hopi desempleo. E ta manera un fase den bida. Tin un temporada bon y tin un temporada malo. “Nos tur por sali for di dje y si e ta kere den Aruba. Prins ta biba aki y tin hopi amistad aki y no lo impidie pa e sigui ta aki.”
Por ultimo Prins a gradici e appnan di sosten cu el a haya di e hendenan aki mes, despues cu a mira e relato di e dia anterior. Tambe ta gradici esnan cu a bin cerca dje na e luga cu den ki circunstancia lo yuda y tambe trahadonan cu a sosten’e 100%. Esaki ta algo temporal. Nos lo sali for di dje y por bin cosnan mas grandi. Y si bo ta kere den Dios, tur cos por.
