Empleadonan di ASTEC ta bisa cu keto bay nan ta hayando molester di e huma di WEB. Esey ta pone cu cada biaha trabaonan ta wordo para.
Ta na momento cu trabao a wordo para na mas ocasion caminda tabata un of mas protesta, Gobierno a cay aden y a yega na un solucion hunto cu WEB pa e problema aki. Ta resulta cu esaki no ta e caso.
No a tende masha dia di e problema aki, pero trahadonan ta bisa cu diamars mes e trabaonan a para for di mainta, na momento cu e barco Ipanema tabata para na Waf di Barcadera. A cuminsa baha container, mas of menos 10, e trabao a para.
Henter mainta te cu atardi, ainda trabao tabata para, pasobra e huma di WEB tabata causando un problema, un molester pa e empleadonan. Cada biaha ta midi esaki tambe. Mientras cu e midimento ta duna resultado negativo pa loke ta nan salud, nan ta para e trabao.
Nan ta keda sinta te ora cu e situacion calma. Y diamars por ehempel, mester a baha mas cu 125 container, mientras cu mester a lanta tambe casi 200 container cu mester a bay bek riba e barco Ipanema.
E barco a keda eynan pa oranan largo sin cu nan tabata baha container y te anochi finalmente nan a keda cla y trahadonan hasta mester bay over, si mester na traha overtime, cual tambe ta costa Astec placa, despues cu cos calma y e biento hala e huma molestoso den otro direccion y cu no ta afecta e trahadonan di Astec.
E barco a sali laat y a bay direccion Corsou. Pa 2’or di merdia di diaranson lo mester a yega Corsou. Mientras tanto cu tin un otro barco aden y ta mirando cu e trabaonan ta andando. Na e momentonan aki, riba diaranson den dia, e molester no tabata manera diamars. Trahadonan di Astec ta on, bahando containernan for di e barco Saturn, cual tambe ta para den waf, despues di a bin for di Corsou den oranan di diaranson mainta.
Lo trata di haya contacto cu Sindicato di esnan cu ta traha na Astec. A busca manera pa yama nan, pero no a haya contacto cu nan. Tin informacion si, di un cantidad di trahado cu ta informando cu nada no a cambia. E molester ta sigui y cada biaha ta paralisa trabao. Mas bien, e informacion aki ta wordo wanta paden y e trabaonan ta wordo para y trabao no ta sigui. E ta keda un problema keto bay pa motibo di e huma cu ta sali for di WEB, di cual nan a bisa cu nan lo bay busca un fuel oil cu mas calidad, pa e molester aki no existi mas.
Pero claramente por mira cu esey no ta e caso, pasobra segun e biento ta supla, e huma ta bin p’abao. A lanta hasta nos drone y na momento cu a haci esaki, den un angulo, por wak con e huma ta bin for di WEB direccion waf di Barcadera, cu consecuencia cu e ta afecta funcionamento di e bahamento di container for di e barconan cu ta bin trece Container na Aruba.
Trabaonan ta continua si. E molester no tey pa awo. Pero den cualkier momento e por presenta atrobe, unda cu trahadonan ta bay sinta un caminda te ora cos calma, ta wordo midi atrobe y na momento cu haya un señal cu ta OK pa nan salud, nan lo continua cu nan trabao.
Informacionnan cu lo sigui riba dje, buscando e reaccion tambe di WEB, Gobierno y tambe sindicato di e trahadonan di Astec pa mira ki dia e problema aki ta tras di lomba. Awo tin mas molester tambe cu trabaonan di cement y santo cu ta yega tambe poco p’ariba di e waf di Barcacera.
Tur e cosnan aki tin atencion p’e. Nos ta para hunto cu e trahadonan pa nan salud, pa e no wordo afecta.
