E proyecto di ex Bushiri Hotel ta den pipeline pa basta aña caba. E ta un proyecto cu a lanta preocupacionnan dos pa tres aña pasa, unda cu bo ta mira e edificio di Ex Bushiri hotel ta bay atras y ta atacha e imagen di pais Aruba, segun director di DOW, Marlon Croes.
Den luz di esey tabata tin diferente conseho a bay den direccion di Gobierno, unda cu un tabata pa institui un comision cu lo studia e materia aki y bin conseho pa Gobierno, ki pa haci cu Bushiri. A tende diferente storia for di diferente tipo di proyecto cu por bin eynan.
Gobierno su turno a institui un comision cu ta consisti di diferente departamento di Gobierno, Directie Financien, Directie Wetgeving y Juridische Zaken, DOW, DIP y hopi otro mas instancia, departamentonan di Gobierno cu a forma parti di e comision aki y despues di basta reunion cu a tuma luga, a conseha Gobierno, mirando e circunstancianan cu tin, ta na su luga pa basha Bushiri Hotel abao. Esey a trece cune cu Gobierno a duna instruccion na DOW pa cuminsa cu e proceso di bay un destaho publico. E destaho publico a tuma luga. Despues di a haci tur estudio necesario riba materialnan cu por ta dañino pa nos medio ambiente, a start esaki. Despues di un bidding publico cu tabata tin, unda cu tabata tin diferente compania cu a participa, despues analisa tur e cifranan, e biddingnan cu tabata tin, a apunta WeBuild como e contratista cu lo bay sloop ex Bushiri Hotel. Ta planea cu tin cu cuminsa e siman aki. Lo purba di tin e groundbreaking mañan, diaranson, pa por cuminsa cu e trabao aki.
Kico nos lo bay mira
Loke cu pueblo lo bay mira, ta cu e cura lo wordo kita, e luga lo wordo haci limpi rond di dje. Lo trata e trabao cu hopi cautela mirando cu tin hopi asbest. E compania, cu ta registra pa DTI como un compania cu por remove asbest for di e proyecto, ta bay haci’e na un manera perscribi door di DTI y tambe deshaci di dje na un manera perscribi pa Serlimar y DTI.
Bisando esey, Croes a splica, cu e trabao lo bay tuma mas of menos 45 pa 55 dia di trabao pa por caba cun’e. Despues di esey, e plan pa futuro ta, cu aki lo bay bin un area publico, unda cu tin parkeerplaats, beach, full un caracter habri, pa asina pueblo, nos comunidad, nos bishitantenan, por disfruta di e area di lama aki.
Proyecto separa
Esaki ta un proyecto separa. Loke si ta bay haci, pa loke ta e sloopmento di Bushiri, ta cu lo saca full e fundeshi afo for di e proyecto y despues lo howl santo blanco, pone riba nan pa por convirti’e den un beach mas lihe posibel.
Fondo
E ta un proceso cu lo bay tuma su tempo ainda. Tin cu caba cu e plan cu tin cu wordo traha pa esaki, unda cu e plan aki lo wordo pega, sincronisa cu e masterplan di APA, pa asina forma un totalidad.
Loke ta trata e sloopmento di e proyecto aki, lo wordo carga pa Gobierno mes. Pa e plan despues, Gobierno lo tin cu busca e fondonan pa financia esaki.
E costo
Esaki a sali mas of menos riba 800 mil florin.
Unda e material lo wordo benta
E asbest lo wordo deshaci na un manera prescribi door di Serlimar y DTI na dump mes. E material di beton, e compania lo bay cun’e, den un of otro trabao.
