“Nos semper por conta cu e sosten incondicional di Wilfred Ras. No di awo, sino semper. E mes ta un deboto cu ta bin nos kapel tur dia”, asina Robert Jeand’or, un di e boluntarionan cu ta yuda na e kapel a confirma na 24ora.com un rato pasa. Awe mainta mes personal di Total Cleaning a yega na e kapel y cu un material special, cu ta combina awa y habon, aplicando e formula di “pressure washer”, a haci tur e murayanan limpi. “Nos ta masha gradici pa e ayudo di semper. Dios lo sa di compensa nan bek”.
Awe mainta trempan, ora cu Robert Jeand’or a yega Kapel di Alto Vista, algo pasa di 5:00am, el a topa cu e murayanan tur na graffiti cu e numbernan 666. No solamente riba muraya, pero na e cura, riba bakinan, bentanan y tur otro caminda cu e anti-social aki a logra flit. A uza un bleki di flit color preto pa por susha tur e edificio unda diariamente centenares di hende ta yega pa por comunica cu Dios y sinti su presencia.
Tur diamars tin misa pa 5:30pm na e kapel mientras cu tur prome diasabra di luna tin un misa pa 7:00am. Ambos evento ta conta cu un publico grandi, specialmente debotonan di mas edad, cu semper tabata y a keda fiel na e kapel. Ora cu luna yen, ta organisa Rosario Bibo, cu tambe ta conta cu un publico grandi pa sigui e ritualnan aki di cerca.
E misionario Venezolano, Domingo Silvestre, procedente di Santa Ana de Coro na Venezuela, a consagra Kapel di Alto Vista oficialmente na aña 1750. Ta e indjannan Caiquetio a trah’e cu murayanan di piedra y dak di palapa. A dedic’e na “Mama Maria, Mama di Rosario”. Na dado momento a bash’e abou y a trah’e di nobo na aña 1952. Esey ta haci cu, oficialmente, no por yam’e como e kapel of misa mas bieu na Aruba pasobra a interumpi su existencia. E edificio religioso mas bieu actualmente na Aruba ta e kerki protestant (chikito) situa den Wilelminastraat # 1. A trah’e na aña 1846.
