Ta existi un tension grandi riba mercado laboral. Empresanan ta confronta problema pa yena vacaturanan cu tin habri. Cu e situacion aki diferente politico y organisacionnan a haci sugerencia pa legalisa cierto cantidad di personanan cu aworaki no tin papel.
Of permiti esnan cu tin permiso cierto caminda, lo por tuma un di dos trabou. E lo alivia e situacion pa doñonan di trabou, pero lo nifica na mesun momento mas entrada pa Sociaal Verzekeringsbank (SVb) cu ta maneha e fondo di pensioen pero tambe caha di Gobierno lo haya mas placa.
E director, ir. Edwin Jacobs, a atende e asunto aki cu Minister di Labor Glenbert Croes. A papia di e tension riba mercado laboral, principalmente e sector di Horeca. No tin suficiente hende pa ocupa e cuponan di trabou existente.
Jacobs di su banda a papia di personanan stranhero cu tin permiso caba y cu despues di nan trabou oficial, tin e disponibilidad pa traha part-time otro caminda. Sinembargo hopi no ta core e riesgo aki awor pasobra ya caba tin cu a haya nan mes den problema.
