Awe nochi a tuma luga e sorteo # 1343 di Lotto di Aruba, den cual a saca e numbernan ganado di e Lotto Mini Mega. E numbernan ganado tabata 19, 25, 26, 30 y Mega Ball tabata 14. E premio stipula ta Afl. 725.000,= pa Mini Mega y cu 2 florin mas por a gana Afl. 400.000,= extra, pa hunto cera un premio completo di Mini Mega Plus di Afl. 1.125.000,=. Un solo persona a resulta ganado di e bunita premio aki!
Ta despues di mas of menos dos aña cu Lotto di Aruba ta saca un premio miyonario atrobe pariba di brug. E ultimo premio grandi asina a cay na aña 2019, ora e bende un Mini Mega di Afl. 1.250.000,= na Suerte Pos Chikito. Awe nochi e premio a yega na Cura Cabay Lottery, unda un solo hungado a gana e bunira premio di Afl. 1.125.000,=.
Maria tin hopi suerte
Maria Angela ta maneha por lo menos dos oficina di number, esta Cura Cabay Lottery y un otro oficina mas na Mabon. E tin mas of menos 20 aña caba bendiendo catochi y Lotto. El a conta nos cu den su trayectoria, el a bende tur sorto di premio grandi, for di Lotto di dia te na Mini Mega. Orguyosamente e por menciona di tin un red grandi di cumpradonan, cu sa cu cerca dje tin suerte. Nan ta keda bin tur dia of tur siman pa sigui purba nan suerte y sigui gana!
Pa locual ta e premio di awe, e no por bisa ainda ken a gan’e. Separa cu e ta secreto, nan como bendedo tampoco sa ken a cumpra ni ki number nan a cumpra. Mester warda te ora cu e ganado presenta na oficina di Lotto di Aruba den Paardenbaaistraat pa reclama su premio miyonario. Nan mes como oficina di number no ta paga premionan grandi asina. Maria Angela a bisa di ta sinti su mes masha satisfecho y orguyoso ora su clientenan gana premio, cua cu ta, pasobra tur hende cu cumpra ta cu meta pa gana. Y si e por aporta na nan felicidad, ya ta hacie feliz caba.
Di dos premio miyonario pa 2021
Esaki ta di dos biaha caba cu e sorteo di Mini Mega di Lotto di Aruba ta produci un premio miyonario. E prome tabata dia 12 di januari ultimo, ora cu a saca un premio di no menos cu Afl. 1.825.000,=. A bende e premio ey den e bario di Boegoeroei den e districto di Noord. Algun dia despues abogado mr. Patrick Brown a reclama e premio den nomber di su cliente, cu obviamente a keda incognito.
E industria di Lotto na Aruba
Tin mas di 180 rebendedo di Lotto di Aruba, situa tur rond di nos isla. Lotto anualmente ta paga mas o menos 5 miyon florin na comision na rebendedonan, pues ta mira den cada un di nan un bon partner di negoshi. Separa di e mas di 110 miyon florin paga na premio e ultimo 5 añanan, Lotto ta paga comision na rebendedonan y sin lubida BBO na Departamento di Impuesto (DIMP). Tur esaki ta afecta nos economia den forma positivo.
Lotto di Aruba
Lotto, e loteria di Aruba tin diferente wega manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa y Gana.
Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.