Pa algun tempo caba Nhora v/d Biezen ta bibando den un situacion hopi fastioso y alarmante. A perde trabou y a cay atras cu pagamento di huur. Nhora ta biba den un apartamento na Ponton hunto cu su yiu homber. Debi cu no por a cumpli cu pago di apartamento, e debe a sigui crece y a surpasa e suma di shete mil florin. Doño di e apartamento a duna varios chens, sinembargo no por wanta mas.
A duna Nhora dos opcion, sea ta trece e placa di huur atrasa of tin cu entrega e apartamento. Locual ta hacie mas alarmante, ta cu, a dun’e te cu 11:00 am pa awe diabierna. Obvio, cu e no cumpli cu e ‘deadline’ pero ta haciendo su maximo esfuerso pa por yega na un fondo p’asina paga maske t’un parti di e debe.
Debi cu Nhora v/d Biezen no tin trabou, ta hacie dificil pa hasta e sobrebibi. Tur dia e ta lanta, sin sa kico ta bay come mainta, merdia corda pa anochi. A purba busca yudansa na diferente instancia pero sin resultado. A purba busca trabou, pero debi cu e tin sesentiun aña, ta bis’e cu e ta mucho bieu.
Sinembargo el a logra haya un trabou, pero e tin mester di un carchi berde di salud, claro, e ta costa placa pa sac’e tambe, di cual e no tin. Nhora ta pidi comunidad di Aruba pa yud’e p’asina e paga su huur pa nan no sac’e porta afo. Si tin cualkier persona cu por ofrece un trabou, tambe e lo keda contento.
Si ta desea di yuda Nhora v/d Biezen, por pasa na su apartamento na Ponton 81-H, apt # 2 of por tuma contacto cu ne na 6412657. Si tin persona cu ta desea di transfer un suma p’e, por haci esaki riba su account di Aruba Bank, number di cuenta: 302010190 – Nhora v/d Biezen.
