Un rato pasa a sosode un accidente cu basta daño material na altura di Rooi Lamunchi, poco pabou di La Granja na Savaneta. Ta trata di un auto Nissan modelo Maximo color cora numera A-58609. E auto tabata biniendo for di pabou direccion pariba balabala. No solamente cu tabata core duro, sino tabata pasa auto pa loco tambe. Net n’e t-kruising na altura di Pos Chikito 89-B e chauffeur a perde control, ranca por lo menos dos borchi di trafico pa djey dal den varios baranca y bay para dobla den dos.
E chauffeur a resulta levemente herida, ambulance a presenta pa brinda atencion medico n’e victima. Te con leu por a tuma nota, ta trata di un solo persona den e vehiculo. Debi na e impacto fuerte, e auto practicamente a keda ‘total loss’, airbag a sali, windshield kibra, front na werki, sin conta e bateria cu a sali fo’i motor y bay para por lo menos cinco meter leu di e auto. Polis di trafico a presenta pa documenta e accidente mientras e otro agente a desvia trafico. Tin cu agrega cu e auto no tin ningun tipo di papel, pues, no tin seguro, ni number paga. P’esey a opta pa tuma e auto den beslag.
