Diaranson merdia, algo prome cu 12’or, cu urgencia unidadnan di brandweer a presenta na edificio di Aureus School of Medicine na Wayaca, unda cu a bati alarma di candela na e scol.
Aparentemente tabata tin cierto trabaonan tumando luga den e plafond relaciona cu wayanan di coriente of di camara/sistema di siguridad. Tabata tin solamente un persona cu a corta su brasa den e proceso di evacuacion. Por lo general tur cos a cana manera mester ta. Durante di e maniobranan pa paga e candela, brandweer a kibra glas di e edificio na piso tres pa asina e huma por a sali, esey ta segun informacionnan cu a wordo duna na momento di e suceso.
Vocero di Cuerpo di Bombero, Ferdinando Ponson, a splica den un entrevista riba con e situacion lo sigui cu e scol, cu e candela lo por a core parti di e dak y a drenta via e buraconan di doorvoer y a pasa di local pa local. E momento eynan no tabata tin ningun hende den e seccion di e edificio ey. Ora cu e alarma a bay on, tur hende a evacua e luga bon y a sali sano y salo for di e edificio.
Kico por a pasa
Loke por a constata cu el a cuminsa den e piso full ariba y den e parti di plafond, di manera cu ningun hende no por a mira cu el a cuminsa den un local. A busca informacion di biaha si tabata tin kimico den e edificio, pa por a haci un otro maniobra. Esaki a bay cu no tabata tin nada kimico eyden ni tampoco nada cu por a reacciona cu por a haci e candela mas peligroso cu e tabata caba.
Prevencion y mantencion
E edificio ta uno cerca di aeropuerto. Pa loke ta e medidanan di prevencion, nan tabata tin varios den e luga y tabata tin cosnan poni. Door cu e studiantenan ta drumi den dje, e no ta poni pa ta na e manera ey. E dormitorionan mester a wordo cera riba conseho di brandweer. Awo, ta cuestion di sinta papia cu directiva di e scol, pa nan por drecha esakinan mas lihe posibel pa pone esaki prome cu nan bay den operacion bek den e temponan cu ta biniendo awor aki.
Cera pa publico y studiante
E conseho di brandweer ta pa mantene e luga cera te ora cu nan por haci un cleanup completo. Tambe, despues di un candela, door di tur e huma cu a bay den henter e edificio, lo tin CO2 den e luga y esaki mester tuma medidanan pa esaki por ta na 0, pa por pone hende bek den e luga. E sistema di airco completo tambe tin cu wordo cambia, Ponson a finalisa bisando.
